काठमाडौं । नेपाल दूरसञ्चार प्राधिकरणले चालु आर्थिक वर्ष २०८२/८३ को साउन मसान्त सम्ममा १९६९.९३३ किलोमिटर अप्टिकल फाइबर विस्तार गरेको छ।
ग्रामीण दूरसञ्चार विकास कोष परिचालन गरी मध्यपहाडी लोकमार्ग तथा जिल्ला सदरमुकाम जोड्ने महामार्ग/ब्याकबोन नेटवर्क निर्माण गर्ने कार्य अन्तर्गत उल्लिखित क्षेत्रफलमा अप्टिकल फाइबर बिछ्याइएको हो।
नेपाल दूरसञ्चार प्राधिकरणका प्रवक्ता मिनप्रसाद अर्यालका अनुसार प्राधिकरणले मध्यपहाडी लोकमार्गको पाँच हजार दुई सय ३३ किलोमिटर क्षेत्रफलमा फाइबर बिछ्याउने योजना छ।
प्रवक्ता अर्यालले सात प्रदेशलाई तीन खण्डमा विभाजन गरेर तीन छुट्टाछुट्टै कम्पनीलाई जिम्मा दिइएको बताए।
फाइबर विस्तारको तीन खण्डमध्ये दुई खण्डमा विस्तारको काम अगाडि बढेको भए पनि एक खण्डको काम अहिलेसम्म सुरु नै हुन सकेको छैन।
दुई खण्डको काम आधा जति भइसक्दासम्म अहिले बल्ल दोस्रो खण्डको कामका लागि सम्झौता भएको छ। अप्टिकल फाइबर बिछ्याउने कार्य ‘क’, ‘ख’ र ‘ग’ खण्डमा विभाजन गरेर सुरु गरिएको थियो।
दुई वर्षभित्र अप्टिकल फाइबर बिछ्याई सक्नुपर्ने गरी प्राधिकरणले युटिएलसँग २०७४ वैशाख २५ गते दुई अर्ब एक करोड रुपैयाँमा ठेक्का सम्झौता गरेको थियो।
दूरसञ्चार प्राधिकरणले अप्टिकल फाइबर बिछ्याउन ग्रामीण दूरसञ्चार कोषको नौ अर्ब ८९ करोड १७ लाख रुपैयाँ बजेट छुट्याएको थियो। यसमध्ये हालसम्म करिब दुई अर्ब रुपैयाँ खर्च भएको प्राधिकरणले जनाएको छ।
मध्यपहाडी लोकमार्गमा ९८ कोर, जिल्ला सदरमुकाम र मध्यपहाडी लोकमार्गको पूर्व–पश्चिम राजमार्गसँग जोड्ने सडकमा ४८ कोर र नगरपालिकासम्म २४ कोरको अप्टिकल फाइबर प्रयोग हुने दूरसञ्चारले जनाएको छ।
