काठमाडौं । जनमानसमा भ्रष्टाचारको छवि लिएर चर्चामा रहिरहने पात्र नेपाल नागरिक उड्डयन प्राधिकरणका महानिर्देशक प्रदीप अधिकारी सहितलाई लामो समय लगाएर अख्तियार दुरुपयोग अनुसन्धान आयोगले थप सातविरुद्ध विशेष अदालतमा भ्रष्टाचारको आरोपपत्र दायर गरेको छ ।

नेपाल नागरिक उड्डयन प्राधिकरणमा नलिन्चोक हेलिपोर्ट निर्माण प्रक्रियामा गम्भीर अनियमितता भएको ठहर गर्दै आयोगले महानिर्देशक प्रदीप अधिकारी, तत्कालीन निर्देशक मुरारी भण्डारीसहित ६ जना कर्मचारी र अभियन्त्र कन्सल्टिङ प्रा.लि. तथा सो कम्पनीका संचालक विजयर थापाविरुद्ध भ्रष्टाचारको आरोपपत्र दायर गरेको छ।

आयोगका अनुसार नलिन्चोकमा नयाँ हेलिपोर्ट निर्माणका लागि अनिवार्य हुने सम्भाव्यता अध्ययन नगरी, पूर्व सहमति तथा कानूनी प्रक्रिया बाइपास गर्दै मनपरी रूपमा डिजाइन, लागत अनुमान, डीपीआर र खरिद प्रक्रिया अघि बढाइएको पाइएको छ।

प्रारम्भिक टिप्पणी गर्ने इन्जिनियर सम्वृद्धि श्रेष्ठ र एरोड्रम इन्जिनियरिङ विभाग प्रमुख मुरारी भण्डारीले नै सम्भाव्यता अध्ययन गर्ने प्रतिबद्धता जनाए पनि अध्ययन नै नगरी आफैँले कागज तयार गरी परामर्शदाता छनोट प्रक्रिया अघि बढाइएको आयोगले जनाएको छ।

कुल ७ प्रतिवादी विरुद्ध भ्रष्टाचार मुद्दा

प्रदीप अधिकारी – महानिर्देशक, नेपाल नागरिक उड्डयन प्राधिकरण
मुरारी भण्डारी – तत्कालीन निर्देशक, एरोड्रम इन्जिनियरिङ
नल विक्रम थापा – तत्कालीन उप–प्रबन्धक (हाल प्रबन्धक)
इन्जिनियर सम्वृद्धि श्रेष्ठ
गुरुदत्त अधिकारी
अभियन्त्र कन्सल्टिङ प्रा.लि.
विजय थापा, संचालक, अभियन्त्र कन्सल्टिङ प्रा.लि.
आयोगले उनीहरूलाई पद दुरुपयोग, मिलेमतो, कानूनी उल्लङ्घन र सार्वजनिक सम्पत्तिमा हानि पुर्‍याएको आरोपमा विशेष अदालतमा मुद्दा दायर गरेको जनाएको छ।

छानबिनले देखाएको मूल बुँदाहरू

• अनिवार्य सम्भाव्यता अध्ययन नगरी परियोजना अघि बढाइएको

• अनुभवविहीन परामर्शदातालाई मिलोमतोमा छनोट

• अपूरो/त्रुटिपूर्ण डीपीआरलाई वैधानिक प्रतिवेदन झैँ पेश

• बजेट स्वीकृत नभई खरिद प्रक्रिया सुरु

• खरिद गुरुयोजना/वार्षिक खरिद योजना स्वीकृत नभएको

• मन्त्रालय र नेपाल सरकारलाई थाहा नदिई प्रक्रिया अघि बढाएको

• आइसीएओको मानक, नागरिक उड्डयन ऐन, सार्वजनिक खरिद ऐन–नियमावलीको उल्लङ्घन

• निर्माण सम्पन्न संरचना सुरक्षितरूपमा सञ्चालन असम्भव।