काठमाडौं । नेपाल प्रिमियर लिग (एनपिएल)को दोस्रो संस्करणको विजेता लुम्बिनी लायन्सले आज (शनिबार) ५ गतेदेखि लुम्बिनी प्रदेशका विभिन्न जिल्लामा ट्रफी सेलिब्रेसन टुर गर्दैछ । लुम्बिनी लायन्सले सार्वजनिक गरेको तालिकानुसार बाँके र बर्दियाबाट सुरु हुने टुर पुस १५ गते रूपन्देहीमा आएर पूरा हुनेछ ।
तालिका अनुसार आज (शनिबार) पुस ५ गते नेपालगञ्जको बागेश्वरी मन्दिरदेखि गुलेरियासम्म र भन्सागढीदेखि कोहलपुरसम्म ट्रफी प्रदर्शन गरिनेछ । पुस ६ गते (आइतबार) दाङको तुल्सिपुर-घोराहीमा टुर आयोजना हुनेछ ।
पुस ७ गते (सोमबार) रुकुमको रुकुमकोट-खलंगासम्म, पुस ८ गते (मंगलबार) रोल्पाको लिवाङ-सुलिचौरसम्म, पुस ९ गते प्युठानको भिंग्र्रीदेखि स्वर्गद्वारीसम्म, पुस १० गते विजुवार बरुङ्लादेखि चकचके दरभाङ र भालुवाङसम्म टुर रहने जनाइएको छ ।
यस्तै पुस ११ गते कपिलवस्तुको चन्द्रौटा-कृष्णनगर-तौलिहवा-गोरुसिंगेसम्म, पुस १२ गते अर्घाखाँचीको सुपादेउराली मन्दिरदेखि सन्धिखर्कसम्म, पुस १३ गते गुल्मीको तम्घासमा, पुस १४ गते पाल्पाको तानसेन बजार, पुस १५ गते नवलपरासीको बर्दघाट-सुनवलसम्म र पुस १५ गते नै रूपन्देहीको भैरहवादेखि लुम्बिनीसम्म टुर आयोजना गरिनेछ ।
लुम्बिनी लायन्सका अनुसार पुस १६ गते बुधबार बुटवलको सिद्धबाबा मन्दिरदेखि ट्राफिक चोकसम्म टुर आयोजना हुनेछ भने मेगा कन्सर्ट पनि आयोजना हुनेछ । एनपिएलको दोस्रो संस्करणको फाइनलमा लुम्बिनी लायन्सले सुदू्रपश्चिम रोयल्सलाई छ विकेटले पराजित गरेको थियो ।
लुम्बिनीले त्यससअघि दोस्रो क्वालिफायरमा विराटनगर किंस र प्लेअफको एलिमिनेटरमा काठमाडौं गोर्खाजलाई पराजित गरेको थियो । एनपिएलको पहिलो संस्करणको जनकपुर बोल्ट्सले जितेको थियो ।(हिमालय टाइम्स)
