दोलखा । दोलखाबाट प्रतिनिधि सभा सदस्य उम्मेदवार बालकृष्ण शिवाकोटीले समृद्धिको राजनीति र हिंसाबीच कुनै कोणबाट प्रतिष्पर्धा हुन नसक्ने बताउनुभएको छ ।
दोलखाको भीमेश्वर नगरपालिका–७ मकैबारीस्थित घरदैलो कार्यक्रममा उहाँले यस्तो बताउनु भएको हो । हिंसाको राजनीतिमा विश्वास गर्नेहरु अझै पनि विगतको धङ्धङीबाट मुक्त हुन नसेको बताउँदै उहाँले समृद्धिका लागि ‘इनोभेटिभ’ उद्यम नै वर्तमानको आवश्यक रहेको औँल्याउनुभयो ।
चुनावी प्रचारप्रसारका क्रममा उहाँले मतदाता माझ भन्नुभयो, ‘हिंसा आखिर हिंसा नै हो । यसले समृद्धि हासिल गरेको उदाहरण संसारमा कतै छैन । यसको मारमा हामी पनि पर्यौँ । जसको परिणाम हामीले आजसम्म भोगिरहेका छौँ । याद रहोस्, सिर्जनशील उद्यमले देश निर्माण गर्छ । रोजगारीको सिर्जना गर्छ । हजारौँको भोको पेट भर्छ । हामी उद्यममार्फत मुलुकलाई समृद्ध बनाउन चाहन्छौँ । तर, हिंसामा विश्वास गर्नेहरु यसलाई ध्वस्त पार्न चाहन्छन् । त्यसो हुँदा समृद्धिको राजनीति र हिंसाबीच कुनै प्रतिष्पर्धा हुँदैन ।’
मुुलुकको शासन व्यवस्था बदलिएसँगै राजनीतिक अधिकारका मुद्दा समाप्त भएका हुँदा समृद्धि नै अहिलेको मुल मुद्दा भएको उहाँले मतदातासँग घरदैलो भेटघाटका क्रममा बताउनुभयो ।
प्रत्येक नागरिक उद्यमशील बन्न सके मात्रै समृद्ध नेपाल बन्ने हुँदा प्रत्येक नागरिक उत्पादनमा जोडिन आवश्यक रहेको उहाँको भनाई थियो । ‘मुलुकमा राजतन्त्रको अन्त्य भयो । नयाँ व्यवस्था आयो । नयाँ संविधान बन्यो । त्यो सँगै हामीले राजनीतिक अधिकारका बिषयलाई बिट मारेका छौँ । अब आवश्यकता छ समृद्धिको । यसका लागि उद्योग कलकारखाना खोलिनुपर्छ ।
प्रत्येक नागरिक उद्यमी बन्नुपर्छ’, घरदैलो कार्याक्रममा उहाँले भन्नुभयो,‘ यसो हुन सके मात्रै रोजगार सिर्जना हुन्छ । खाडीको चर्को घाममा नेपाली दाजुभाइ जानुपर्ने बाध्यता अन्त्य हुन्छ । यस अभियानको पक्षपाती हुँ म । त्यसो हुँदा ध्वंशमा विश्वास गर्नेहरुसँग मेरो कसरी प्रतिस्पर्धा हुन्छ ?’
उद्यममार्फत आफ्ना सबै व्यक्तिगत आवश्यकता पूरा भएको हुँदा अबको जीवन मुलुक विकासमा लगाउने उहाँको भनाई थियो । कार्यक्रममा एमाले जिल्ला समिति अध्यक्ष तथा दोलखा (ख) को उम्मेदवार नरबहादुर श्रेष्ठले समृद्धि विनाको राजनीति अब ‘आउट डेटेड’ भएको बताउनुभयो ।
उहाँले भन्नुभयो, ‘राजनीतिक अधिकारका मुद्दा अहिलेको आवश्यकता होइन । व्यवस्था परिवर्तनसँगै यी पूरा भइसके । समृद्धि नै अहिलेको आवश्यकता हो । त्यसो हुँदा अबका हरेक युवा उद्यमी बन्नुपर्छ । उत्पादनसँग जोडिनुपर्छ । एमाले यही मुद्दा बोकेर जनतामाझ आएको छ । मंसिर ४ मा मतमार्फत जनताले यसलाई अनुमोदन गर्नेछन् ।’
