काठमाडौँ । नेपाल कम्युनिष्ट पार्टी (एकीकृत समाजवादी)का अध्यक्ष एवं पूर्वप्रधानमन्त्री माधवकुमार नेपालले बहुआयामिक व्यक्ति स्व. लक्ष्मीदास मानन्धरको जीवन नयाँ पुस्ताका लागि प्रेरणाको स्रोत भएको बताउनुभएको छ ।
भाषासेवी, धर्मसेवी, सफल उद्यमी, राजनीतिज्ञ एवं समाजसेवी स्व लक्ष्मीदास मानन्धरको जीवन पुस्तक ‘परिवर्तनका संवाहक लक्ष्मीदास’ को विमोचन गर्दै स्व मानन्धरको जीवन सबैका निम्ति प्रेरणाको स्रोत बन्ने बताउनुभयो ।
पूर्वप्रधानमन्त्री नेपालले आफ्नो पहलमा लक्ष्मीदासलाई राष्ट्रियसभाको सदस्य बनाएको स्मरण गर्नुभयो । लक्ष्मीदासको जीवन इतिहासको खुला पाना भएको उहाँको भनाइ थियो । इतिहासमा आफूले खेलेको भूमिका लिपिबद्ध गर्न सके त्यो लिपि जीवनभर बाँचिरहने नेता नेपालले बताउनुभयो ।
लुम्बिनी विश्वविद्यालयका पूर्व उपकुलपति त्रिरत्न मानन्धरले काठमाडौँको ठहिटीमा मध्यम परिवारमा जन्मनुभएका लक्ष्मीदासले आफ्नो बुद्धि, मेहेनत र परिश्रमले एउटा सम्पन्न परिवारको स्थापना गर्नुभएको तर्क गर्नुभयो । स्व लक्ष्मीदासले सामाजिक, धार्मिक, शैक्षिक र औद्योगिक क्षेत्रमा महत्वपूर्ण योगदान दिनुभएको उहाँको भनाइ छ ।
पुस्तकका लेखक द्वय लक्ष्मण अधिकारी र शुभेच्छाविन्दु तुलाधरले लक्ष्मीदासको जीवनको सङ्घर्ष र सफलता तथा परोपकारी कार्यले हरेक मानिसलाई जीवनको अर्थ र मूल्य बुझ्न सघाउने बताउनुभयो । लक्ष्मीदासले आफ्नो जीवनमा गरेका सङ्घर्ष नयाँ पुस्ताका लागि उपयोगी हुने उहाँहरूको भनाइ थियो ।
स्व लक्ष्मीदासका कान्छा छोरा नारायणदास मानन्धरले पुस्तकमा बुबाको जीवनका पाइला, उतारचढाव र महत्वपूर्ण कार्य स्मरण गराउने कैयौँ महत्वपूर्ण सन्दर्भहरू रहेको बताउनुभयो । उहाँले लक्ष्मीदासको जीवनीबाट हरेक व्यक्तिलाई समाजसेवी र कर्मयोगी बन्न प्रेरणा दिने विश्वास व्यक्त गर्नुभयो ।
सोही अवसरमा नेपाली भाषाका अभियन्ता एवं साहित्यकार दुर्गालाल श्रेष्ठले लक्ष्मीदासका बारेमा लेख्नुभयो कविता वाचन गर्नुभएको थियो । सोही अवसरमा पूर्वमन्त्री जीवनराम श्रेष्ठ, बागमती प्रदेशका पूर्वमन्त्री एवं सांसद वसन्त मानन्धरको सहभागिता थियो । रासस
