दोलखा ।
हनुमन्तेश्वर मा.वि मैनापोखरीले ६३ औँ स्थापना तथा २७ औँ अभिभावक दिवस मनाएको छ । फागुन ७ अर्थात प्रजातन्त्र दिवसका दिन विद्यालयमा वैतेश्वर ४ का वडा अध्यक्ष कुमार चौलागाँईको सभापतित्व तथा दोलखाका संघीय सांसद् गङ्गा कार्कीको प्रमुख आतिथ्यतामा विशेष समारोह आयोजना गरिएको थियो ।
कार्यक्रममा विद्यालयका प्र.अ. भरत के. सीले विद्यालयको वार्षिक प्रतिवेदन प्रस्तुत गर्दै विद्यालयमा हाल १००६ जना विद्यार्थी र ५० जना शिक्षक तथा कर्मचारी रहेका र ४ करोड २८ लाख १६ हजार ८ सय ७४ रुपैयाँ बराबरको आय व्यय प्रस्तुत गर्नुभएको थियो ।
कार्यक्रममा हनुमन्तेश्वर क्याम्पसका क्याम्पस प्रमुख कमलबहादुर दहालले क्याम्पसको वार्षिक प्रतिवेदन प्रस्तुत गर्नुभएको थियो । कार्यक्रमको अवसरमा प्रमुख अतिथिबाट हनुमन्तेश्वर मा.विले नियमित रुपमा प्रकाशन गर्दै आएको विद्यालय स्मारिका विमोचन गरिएको थियो ।
दिवसको अवसरमा एस.ई.ई. परीक्षामा जिल्ला प्रथम भएका आदेश दहाल, द्वित्तीय भएका रमण आचार्य त्यसैगरी छात्रातर्फ जिल्ला प्रथम भएकी पूर्णिमा मिजार लगायत अन्य उत्कृष्ट विद्यार्थीहरुलाई सम्मान गरिएको थियो ।
यसैगरी उत्कृष्ट वर्ष शिक्षकका रुपमा विज्ञान शिक्षक झिमि लामा र ईन्जिनियर विभागका इन्जिनियर शिक्षक खिमबहादुर खत्रीलाई सम्मान गरिएको थियो ।
दिवसलाई विद्यार्थीहरुले विभिन्न सांस्कृतिक कार्यक्रममार्फत शोभा बढाएका थिए ।
