काठमाडौं । काठमाडौं महानगरपालिकाका प्रमुख बालेन्द्र शाह (बालेन)ले काठमाडौं महानगरपालिका अन्तर्गतका कुनै पनि कार्यालयमा भ्रष्टाचारजन्य कार्य भएमा प्रमाणसहित सम्पर्क गर्न अनुरोध गरेका छन् । सामाजिक सञ्जालमार्फत् उनले राजनीतिक र सामाजिक बेतिथि विरुद्द निरन्तर खवरदारी गर्ने गरेका छन्। उनले महानगरपालिका कार्यालयमा कुनै कर्मचारीले कुनै पनि प्रकरणमा पैसा मागेमा अडिओ र भिडिओसहित प्रमाण पठाउन अनुरोध गरेका छन्। उनले भनेका छन्, “हामी भ्रष्टाचार भएको हेर्न सक्दैनौं, हाम्रो अधिकार क्षेत्र काठमाडौं महानगर पालिका कार्यालयमा कुनै पनि कर्मचारीले कुनै पनि प्रकरणमा पैसा मागेमा प्रमाणसहित हामीलाई सम्पर्क गर्नुहोला, भिडिओ–अडियो सहित।” उनले कसैले भ्रष्टाचार गर्‍यो भनेर बिना प्रमाण आरोप लगाउनुभन्दा प्रमाण जुटाउन र सुशासनमा सघाउन अनुरोध गरेका हु्न् । साथै उनले यस्ता कार्य भएको पाइएमा सर्वसाधारणलाई ह्वास्ट्सएप नम्बर ९८६३५९२०११ मा प्रमाणसहित सम्पर्क गर्न अनुरोध गरेका छन्। उक्त मोबाइल नम्बर उनले मात्र प्रयोग गर्ने भएका कारण उजुरीकर्ताको नाम गोप्य राखिने बालेनले प्रतिबद्धता जनाएका छन्। उनले भनेका छन्, “यो मोबाइल मैले मात्र बोक्ने भएको हुनाले पठाउनेको नाम गोप्य राखिनेछ ।”