काठमाडौँ । आमरण अनशनमा बसेका सांसद सञ्जय गौतमको माग सम्बोधन हुने भएको छ । भौतिक पूर्वाधार तथा यातायात मन्त्री प्रकाश ज्वालाले बबई नदीको जब्दी घाटमा नयाँ पुल बनाउन १० दिनभित्र ठेक्का आह्वान गर्ने प्रतिबद्धता व्यक्त गरेसंगै उनको माग पुराहुने भएको हो । बुधबार मन्त्रालयमा पत्रकार सम्मेलन गर्दै मन्त्री ज्वालाले छिट्टै ठेक्का लगाउने जानकारी दिएका हुन्। गत वर्ष निर्माण गर्दागर्दै पुल भत्किएको पुल नयाँ  निर्माणका लागि सरकारले सक्रियता नदेखाएको भन्दै सांसद सञ्जय गौतम अनशनमा बसेका छन्। उनको अनशनपछि मन्त्रालयको टिम जब्दीघाट पुगेर निर्माणबारे छ्लफल गरेको थियो। भत्केको भन्दा ६ सय मिटर तलमाथि हुने गरी नयाँ पुल निर्माणका लागि ठेक्का लगाउने तयारी मन्त्रालयले गरेको हो।

            नेपाली कांग्रेसका केन्द्रीय सदस्य एवं प्रतिनिधिसभा सदस्य संजय कुमार गौतम आमरण अनशनमा बसेको पाँच दिन भयो । पछिल्लो समय सांसद गौतमको स्वास्थ अवस्था नाजुक बन्दै गएपछि चिकित्सकहरूले निगरानी बढाएका छन् । पूर्वमन्त्रीसमेत रहेका गौतमको शारीरिक तथा स्वास्थ्य अवस्था प्रत्येक दिन नाजुक बन्दै गएको चिकित्सकले जनाएका छन् । जिल्ला अस्पताल, बर्दियाका मेडिकल सुपरिटेन्डेन्ट डा. सुभाष पाण्डेयले उच्च रक्तचापका बिरामी गौतमले पाँच दिनसम्म खाना नखाँदा स्वास्थ्य अवस्था कमजोर बन्दै गएको बताए । ‘दैनिक प्रेसर, सुगर, ज्वरो लगायत स्वास्थ्य परीक्षण गर्नुका साथै निगरानी बढाएका छौं,’ उनले भने, ‘लगातार लामो समय भोकै बस्दा स्वास्थ्यमा दिर्घकालीन असर पर्न सक्छ । अवस्था क्रिटिकल भए बर्दियामा उपचार सम्भव हुँदैन ।’ यस्तै शरीरमा पानीको मात्रा कम हुँदै गएको उनले बताएका छन् ।

        बबई नदीको जब्दीघाट आसपासमा नयाँ पुल निर्माण, गुलरिया र भारतको मुर्तिहा नाका सञ्चालन, नदी नियन्त्रणका लागि पर्याप्त बजेट, बबई सिँचाइमा बजेट कटौती नगर्न, भुरीगाउँ—तेलपानी सडक निर्माण लगायत १५ सूत्रीय माग राख्दै गौतम वैशाख ३० गते देखि आमरण अनशनमा बसेका हुन् । उनको मागप्रति राज्य बेखर भएको भन्दै सत्याग्रह अभियानमा ऐक्याबद्धता जनाउँदै दिनहुँ दर्जनभन्दा बढीले २४ घण्टे रिले अनशन पनि जारी राखेका छन् । कांग्रेसका स्थानीय नेता एंव कानुन व्यवसायी विद्या प्रसाद खनालले सरकारले तत्काल गौतमले उठाएका जायज माग सम्बोधन गर्न आह्वान गरेका छन् । आमरण अनशनका कारण सांसद गौतमको शारीरिक अवस्था जटिल हुँदै गएकाले तत्काल माग सम्बोधन हुनुपर्ने उनले बताए ।सांसद गौतम २०७९ को चुनाबमा बर्दिया १ बाट ३०६११ मत सहित प्रतिनिधी सभामा चुनिएका थिए ।