काठमाडौँ । कांग्रेस नेत्री एवं पूर्वगृहमन्त्री बालकृष्ण खाँणकी पत्नी मन्जु खाँणले मंगलबार पार्टी सभापति शेरबहादुर देउवालाई भेटेकी छन् । मञ्जुले देउवा निवास धुम्बाराही पुगेर नक्कली भुटानी शरणार्थी प्रकरणमा आफ्नो पति बालकृष्ण खाँण पक्राउ परेको बारे चिन्ता व्यक्त गरेकी हुन् ।
मञ्जु मंगलबार बिहान १० बजेतिर देउवा निवास पुगेकी स्रोतले जानकारी दिएको छ । भेटमा मञ्जु खाँणले देउवासँग असन्तुष्टि पोखेकी थिइन् ।
उक्त प्रकरणमा आफ्नो श्रीमानको मात्रै गल्ती नभएको भन्दै सुदूरपश्चिमका देवी देवताको नाम मञ्जुले लिएकी स्रोतको भनाइ छ । नक्कली भुटानी शरणार्थी प्रकरणमा आफ्ना श्रीमान बालकृष्ण खाँणलाई मात्रै फसाइएको र सो कुरा भगवानले देख्ने भन्दै देउवासँगको भेटपछि असन्तुष्टि पोख्दै मञ्जु बाहिरिएकी स्रोतले बताएको छ ।
आफ्नो श्रीमानलाई फसाइएको तर अनुसन्धान गर्दै जाँदा अन्य नेताहरु उक्त प्रकरणमा मुछिने मञ्जुको भनाइ थियो ।
जवाफमा देउवाले बालकृष्ण खाँणबारे चिन्ता नलिन भनेका थिए । ‘तपाईँहरु धेरै चिन्ता नगर्नुस् । मिडियाले दोषी बनाएर हुँदैन । पुलिसले मात्रै दोषी बनाएर पनि हुँदैन, बिना प्रमाण दोषी बनाउन कहाँ पाइन्छ र?’ देउवाले मञ्जुलाई यसो भन्दै सम्झाउने प्रयास गरेका थिए ।
स्रोतका अनुसार मञ्जु देउवासामु निकै आक्रोशित रुपमा प्रस्तुत भएकी थिइन् भने देउवाले उनलाई सम्झाउने प्रयास गरेका थिए । नेपालीलाई भुटानी शरणार्थी बनाएर अमेरिका पठाउने ठगी प्रकरणमा पक्राउ परेका खाँणविरुद्ध जिल्ला प्रहरी परिसर काठमाडौंले संगठित ठगी र राज्यविरुद्धको कसुर अभियोग लगाउन सरकारी वकिल कार्यालयलाई राय दिएको छ ।
देउवाले भने ‘खाँणजी पैसामा बिक्ने खालको मान्छे होइन । उहाँ राष्ट्र र राष्ट्रियताप्रति एकदमै प्रतिवद्ध मान्छे हो’ भनेर मञ्जुलाई आश्वस्त पार्ने प्रयास गरेको स्रोतले बताएको छ ।
नेत्री खाँणसँगको भेटपछि सभापति देउवाले मंगलबार दिउँसो पार्टीका नेता कार्यकर्ताहरुसँग छलफल गरेका थिए । उक्त भेटमा पनि बालकृष्ण खाँण पैसा खाने मान्छे नभएको देउवाले बताएको स्रोतको भनाइ छ ।
