काठमाडौँ । नक्कली भुटानी शरणार्थी प्रकरणमा पक्राउ परेकाहरुमध्ये आइतबारसम्म ५ जनाको बयान सकिएको छ ।
शरणार्थी प्रकरणमा पक्राउ परेकाहरु १७ जनाको हाल अदालतमा बयान जारी छ । हालसम्म प्रतिवादी टंककुमार गुरुङ, सन्दीप रायमाझी, लक्ष्मी महर्जन, सागर राई र केशवप्रसाद दुलालको बयान सकिएको छ ।
बयान शुक्रबारबाट जिल्ला अदालत काठमाडौँ अदालतमा सुरु भएको हो । शुक्रबार सागर राई र केशवप्रसाद दुलालको बयान लिइएको थियो भने बाँकीको आइतबार लिइएको श्रेस्तेदार ज्ञानेन्द्र इटेनीले बताए ।
यस प्रकरणमा मुख्य योजनाकारमध्येका इन्द्रजित राईको पनि बयान आइतबार लिने तयारी थियो तर उनी बयान नै नदिई हिरासतमा फर्किएका छन् । राईलाई बयानका लागि आइतबार जिल्ला अदालत काठमाडौँ उपस्थित गराइएको थियो । तर राई आफ्नो बयानको पालो आएसँगै स्वास्थ्य अवस्था ठीक छैन भन्दै पन्छिए ।
राई आफ्नो बयानको पालो आउनुभन्दा अघिसम्म इजलासमै पत्रिका पढ्ने र आफ्ना वकिलसँग कुराकानी गरेर बसिरहेका थिए । तर जब उनको बयानको पालो आयो उनले भने ‘सञ्चो छैन श्रीमान्, बयान टी ब्रेकपछि दिन्छु ।’
शरणार्थी प्रकरणमा पक्राउ परेकाहरुको बयान न्यायाधीश प्रेमप्रसाद न्यौपानेको इजलासमा भइरहेको छ ।
राईले सञ्चो छैन भनेपछि उनको बयान केहीबेरलाई रोकेर प्रतिवादी टंककुमार गुरुङ र सन्दीप रायमाझीको बयान लिइएको थियो । तर केहीबेरमा बयान दिन्छु भनेका राईले आइतबार बयान नै दिएनन् । राईले पुन: सञ्चो छैन भनेकाले त्यसपछि प्रतिवादी लक्ष्मी महर्जनको बयान लिइएको स्रोतले बताएको छ ।
राईले प्रहरी हिरासतमा रहँदा पनि बयान दिन आनाकानी गरेका थिए । नक्कली भुटानी शरणार्थी बनाएर अमेरिका पठाउने कार्यमा संलग्न भएको आरोपमा इन्द्रजित राई वैशाख १९ गते पक्राउ परेका हुन् । उनी तत्कालीन गृहमन्त्री रामबहादुर थापा ‘बादल’का सुरक्षा सल्लाहकार हुन् । राई द्वन्द्वको विज्ञ भनेर पनि चिनिन्छन् । उनी तत्कालीन संविधानसभा सदस्यसमेत हुन् ।
