काठमाडौं । जल तथा मौसम विज्ञान विभागका अनुसार आज चारवटा प्रदेशमा वर्षा हुने सम्भावना देखिएको छ ।
सुदूरपश्चिम, कर्णाली, लुम्बिनी र गण्डकी प्रदेशका पहाडी भेगका थोरै स्थानमा मेघ गर्जन र चट्याङसहित हल्का वर्षाको सम्भावना रहेको विभागले जनाएको छ ।
मेघ गर्जन र चट्याङबाट हुन सक्ने जोखिमबाट बच्न सतर्कता अपनाउन विभागले आग्रह गरेको छ । अहिले देशभर पश्चिमी निम्न चापीय प्रणाली र स्थानीय वायुको प्रभाव छ ।
आज दिउँसो कर्णाली र सुदूरपश्चिमसहित लुम्बिनी, गण्डकी, वागमती र कोशी प्रदेशका पहाडी भेगमा सामान्य बदली रही देशका अन्य क्षेत्रमा आंशिक बदली रहने विभागको प्रक्षेपण छ । सुदूरपश्चिम, कर्णाली, लुम्बिनी र गण्डकी प्रदेशका पहाडी भूभागका थोरै स्थानमा मेघ गर्जन र चट्याङसहित हल्का वर्षाको सम्भावना रहेको छ ।
आज राति सुदूरपश्चिम प्रदेशमा सामान्य बदली, कर्णाली, लुम्बिनी, गण्डकी, वागमती र कोशी प्रदेशका पहाडी भेगमा आंशिक बदली र देशका अन्य भूभागमा मौसम सफा रहने पूर्वानुमान छ ।
