काठमाडौंं । केही दिनदेखि काठमाडौं उपत्यकासँगै देशभर गर्मी बढेको छ ।

जल तथा मौसम विज्ञान विभाग मौसमको पूर्वानुमान महाशाखाका अनुसार हाल देशमा पश्चिमी वायुका साथै स्थानीय वायुको आंशिक प्रभाव छ । पश्चिमी वायु सक्रिय नरहेकाले वर्षा नहुँदा गर्मी बढेको महाशाखाका वरिष्ठ मौसमविद् प्रतिभा मानन्धरले बताइन् । गर्मीले जनजीवन प्रभावित भएको छ । वरिष्ठ मौसमविद् मानन्धरका अनुसार, “प्रिमनसुन सकिने र मनसुन भित्रिनेबीचको समय भएकाले अझै केही दिन वर्षा हुँदैन ।”नेपालमा सरदर पूर्वी नेपाल भएर १३ जूनमा मनसुन भित्रिने गर्छ । यो पटक मनसुन करीब दुई साता ढिला गरी अर्थात् असारको पहिलो साता मात्रै नेपालमा प्रवेश हुने अनुमान गरिएको छ । त्यतिन्जेल गर्मी घट्न मुश्किल हुने महाशाखाले जनाएको छ । उनका अनुसार मनसुन नभित्रिएसम्म तापक्रम केही दिन बढ्ने देखिन्छ । “तराईका केही जिल्लामा अधिकतम तापक्रम ४० डिग्रीभन्दा माथि पुगेर गर्मी बढ्ने देखिन्छ भने काठमाडौं उपत्यकामा पनि क्रमिक रूपमा तापक्रम बढिरहेको छ ।

मनसुनी वायु सक्रिय नरहे पनि देशका पहाडी भेगमा भने अबको तीन दिन छिटपुट वर्षाको सम्भावना रहेको मौसमविद् मानन्धरले बताइन् । पछिल्लो केही दिनयता काठमाडौंको अधिकतम तापक्रम २३ देखि ३५ डिग्रीसम्म पुगेको छ । काठमाडौं उपत्यकामा बिहानैदेखि चर्को घाम लाग्ने गरेको छ । केही दिनयता अत्यधिक गर्मीका कारण धनुषा, बारा, पर्सा सहित तराई(मधेशका जिल्लाको जनजीवन कष्टकर बनेको छ । तराई(मधेशका केही जिल्लामा अधिकतम तापक्रम ४० देखि ४४ डिग्री सेल्सियससम्म पुगेको छ । तराई क्षेत्रमा मौसम सफा रहने हुनाले अझै गर्मी बढ्ने उनको भनाइ छ ।