काठमाडौं । काठमाडौँ महानगरपालिकाका प्रमुख बालेन साह पछिल्लो समय राष्ट्रको विषयमा बढी चासो राख्ने गरेका छन् । चाहे त्यो सीमानाको कुरा होस् या शब्दावलीको कुरालाई लिएर बढी गम्भिर देखिएका छन् ।

भारतले संसद भवनमा राखेको नक्सामा नेपालका केही भूभागलाई समेत समेटेको देखिए पछि त्यसको विरोध गर्दै उनले आफ्नो कार्यकक्षमा ग्रेटर नेपालको नक्सा राखेर जस्तालाई त्यस्तैको जवाफ दिएका छन् । राष्ट्र र राष्ट्रियताको विषयमा उनले लिएको अडानप्रति दलका नेताहरुले पनि ऐक्यवद्धता जनाएका छन् ।

पछिल्लो समय भारतीय चलचित्र ‘आदिपुरूष’ मा समावेश केही शब्दलाई लिएर उनले आपत्ति मात्र जनाएका छैनन् कि सामाजिक सञ्जालमार्फत ‘जानकी भारतीय छोरी हुन्’ भन्ने आशयको शब्द नसच्चिएसम्म काठमाडौँ महानगरपालिकाभित्र कुनै पनि हिन्दी चलचित्र चल्न नदिने चेतावनी दिएका छन् ।

‘आदिपुरुष’ को संवादमा बनाइयो आवाजरहित भारतीय चलचित्र ‘आदिपुरुष’ मा समावेश ‘जानकी भारतीय छोरी हुन्’ भन्ने आशयको संवादमा आपत्ति जनाउँदै केन्द्रीय चलचित्र जाँच समितिले जाँच पासको प्रमाणपत्र दिन अस्वीकार गरेपछि संवाद आवाजरहित बनाइएको छ ।

समितिका सदस्य ऋषिराज आचार्यले संवाद आवाजरहित बनाइएपछि प्रदर्शनका लागि अनुमति दिने निर्णय गरिएको जानकारी दिए । “चलचित्रमा जानकीलाई भारतीय बेटीको रूपमा प्रस्तुत भएको संवादलाई अनिवार्यरूपमा आवाजरहित (बीप) गर्न लगाई सोपश्चात मात्र चलचित्र जाँच प्रमाणपत्र दिने गरी सार्वजनिक प्रदर्शनका लागि अनुमति दिने निर्णय गरिएको आचार्यले बताएका छन् ।रामायणमा आधारित चलचित्रको सो संवादलाई लिएर सामाजिक सञ्जालमा व्यापक विरोध हुँदै आएको थियो ।