काठमाडौं । जल तथा मौसम विज्ञान विभागले आज कोशी, मधेश, गण्डकी र लुम्बिनी प्रदेशका केही स्थानमा भारी वर्षाको पूर्वानुमान गरेको छ ।
त्यसबाहेक कोशी, वागमती, गण्डकी, लुम्बिनी, कर्णाली र सुदूरपश्चिम प्रदेशका पहाडी भेगमा हल्कादेखि मध्यम वर्षाको सम्भावना देखिएको छ ।
त्यस क्रममा हुने मेघ गर्जन, चट्याङ, बाढी, पहिरो, भूक्षय, गेग्रान बहाव र वर्षाका कारण नदीको स्तर बढेर हुन सक्ने जोखिम वा क्षतिबाट बच्न सतर्कता अपनाउन विभागले आग्रह गरेको छ ।
मनसुनी वर्षाको प्रभाव देशका पूर्वी र मध्य भागबाट अन्य भूभागमा फैलिन सकेको छैन। अन्य भेगमा स्थानीय र पश्चिमी वायुको आंशिक प्रभाव छ ।
आज दिउँसो देशभर आंशिकदेखि सामान्य बदली रहनेछ । कोशी, वागमती, गण्डकी, र लुम्बिनी प्रदेशका पहाडी भेगका केही तथा कर्णाली र सुदूरपश्चिम प्रदेशका पहाडी क्षेत्रलगायत तराईका थोरै स्थानमा मेघ गर्जन र चट्याङसहित हल्कादेखि मध्यम वर्षाको सम्भावना छ । कोशी र गण्डकी प्रदेशका १-२ स्थानमा भारी वर्षाको सम्भावना देखिएको छ ।
आज राति देशभर आंशिकदेखि सामान्य बदली रहने पूर्वानुमान छ । कोशी, मधेश, वागमती, गण्डकी र लुम्बिनी प्रदेशका केही तथा देशको बाँकी भूभागका १-२ स्थानमा मेघ गर्जन र चट्याङसहित हल्कादेखि मध्यम वर्षाको सम्भावना छ। साथै, कोशी, मधेश, गण्डकी र लुम्बिनीका १-२ स्थानमा भारी वर्षाको सम्भावना देखिएको छ ।
