काठमाडौं । जल तथा मौसम विज्ञान विभागले आज देशभर वर्षा हुने प्रक्षेपण गरेको छ ।
विभागका अनुसार आज देशभर सामान्य बदली रहने देखिएको छ। हिजोदेखि पश्चिमी वायुको प्रभाव कम भएको छ, देशभर मनसुनी वायु फैलिएको छ ।
खासगरी, मधेश, वागमती, गण्डकी र लुम्बिनी प्रदेशका धेरै तथा बाँकी प्रदेशका केही स्थानमा मेघ गर्जन र चट्याङसहित हल्कादेखि मध्यम वर्षाको सम्भावना देखिएको छ ।
मधेश, वागमती, गण्डकी र सुदुरपश्चिमका थोरै र कोशीका १-२ स्थानमा भारी वर्षाको सम्भावना छ । भारी वर्षा, मेघ गर्जन र चट्याङका कारण बाढी, पहिरो, डुबान, भूक्षय तथा गेग्रान बहावका हुन सक्ने क्षतिबाट बच्न उच्च सतर्कताका लागि विभागले आग्रह गरेको छ। देशभर मनसुन फैलिएकाले सडक तथा हवाई यातायात, कृषि, पर्यटनलगायत क्षेत्रहरू प्रभावित हुन सक्ने विभागले जनाएको छ ।
अहिले देशभर मनसुनी वायु र भारत उत्तर प्रदेशआसपास विकसित निम्न चापीय प्रणालीको प्रभाव छ ।
आज दिउँसो देशभर सामान्य बदली रहनेछ । देशभर केही स्थानमा मेघ गर्जन र चट्याङसहित हल्कादेखि मध्यम वर्षाको सम्भावना छ । गण्डकी, लुम्बिनी र सुदूरपश्चिमका १-२ स्थानमा भारी वर्षाको पनि सम्भावना छ ।
आज राति देशभर सामान्यदेखि पूर्णतया बदली रहने पूर्वानुमान छ । देशका धेरै स्थानमा मेघ गर्जन र चट्याङसहित हल्कादेखि मध्यम वर्षाको सम्भावना देखिएको छ । वागमती, गण्डकी, लुम्बिनी र सुदूरपश्चिमका १-२ स्थानमा भारी वर्षाको पनि सम्भावना छ ।
