काठमाडौं । मनसुनी वायुको प्रभावका कारण आज देशका ६ प्रदेशमा वर्षा हुने जल तथा मौसम विज्ञान विभागले पूर्वानुमान गरेको छ ।
मनसुनको न्यून चापीय रेखा सरदर स्थानको आसपास अवस्थित छ ।
आज दिउँसो मधेश, कोशी र बागमती प्रदेशका तराईका भूभागमा आंशिक बदली रही बाँकी भूभागमा आंशिकदेखि सामान्य बदली रहनेछ ।
गण्डकी, लुम्बिनी, कर्णाली र सुदूरपश्चिम प्रदेशका धेरै तथा बागमती र कोशी प्रदेशका पहाडी भूभागका थोरै र देशका बाँकी भूभागका एक-दुई स्थानमा हल्कादेखि मध्यम वर्षाको सम्भावना छ । लुम्बिनी, कर्णाली र सुदूरपश्चिमका एक-दुई स्थानमा मेघगर्जन र चट्याङसहित भारी वर्षाको सम्भावना छ ।

आज राति देशभर आंशिकदेखी सामान्य बदली रहनेछ। देशका पहाडी भूभागका केही र बाँकी भूभागका एक-दुई स्थानमा हल्कादेखि मध्यम वर्षाको सम्भावना छ ।वर्षाको कारण सडक तथा हवाई यातायात, स्वास्थ्य, कृषि, पर्यटन लगायतका क्षेत्रहरू र दैनिक जनजीवनसमेत प्रभावित हुन सक्ने विभागले जनाएको छ ।तसर्थ हावाहुरी, भारी वर्षा, मेघ गर्जन र चट्याङ, गेग्रान बहाव, बाढी, पहिरो तथा भूक्षयका कारण हुन सक्ने जोखिम वा क्षतिबाट बच्न आवश्यक सतर्कता अपनाउन हुन विभागले अनुरोध गरेको छ ।