काठमाडाैँ ।सरकारले प्रदेश प्रमुख र मुख्यमन्त्रीहरूका लागि बनाएको ललितपुरस्थित भैंसेपाटी सैंबुमा रहेको आवास तथा सम्पर्क कार्यालय आइतबार हस्तान्तरण गर्यो ।
ललितपुरको भैंसेपाटीमा आवास तथा कार्यालय बनाइएको हो । संघीयताको अभ्यास भइरहे पनि मुख्यमन्त्री र प्रदेश प्रमुखलाई उपत्यकामै आवास उपलब्ध गराएर ठिक उल्टो अभ्यास सरकारले गरेको भन्दै आलोचना भइरहेको छ ।
करिब ८५ करोड रुपैयाँ लगानी सो आवास भवनको उद्घाटनका लागि आइतबार भैंसेपाटीमा मन्त्रीहरूको लर्को नै लागेको थियो ।शहरी विकास मन्त्रालयका अनुसार २७ रोपनी १२ आनामा भवन निर्माण गरिएको छ । हस्तान्तरण कार्यक्रमको सभाध्यक्षता मन्त्री सीता गुरुङले गरेकी थिइन् ।प्रदेश प्रमुख तथा मुख्यमन्त्रीको अवास तथा सम्पर्क केन्द्रको रूपमा आयोजना निर्माण गरिएको हो ।
भवन बनाएर मुख्यमन्त्री र प्रदेश प्रमुखलाई हस्तान्तरण गरिएकाले अब बासस्थानको व्यवस्थापन सम्बन्धित प्रदेशहरुले नै हेर्ने सहरी विकास मन्त्रालयका प्रवक्ता एवं सहसचिव प्रदीप परियारले बताए ।
२७ रोपनी १२ आनामा निर्माण गरिएका ७ वटा भवनमा १४ वटा ब्लक छन् । जसमा प्रदेश प्रमुख र मुख्यमन्त्रीको सम्पर्क कार्यालय रहनेछ । प्रत्येक ब्लकमा रहेका दुईवटा इकाई प्रदेश प्रमुख र मुख्यमन्त्रीका लागि हुनेछ ।
सबै भवन तीन तलाका छन् । जहाँ स्वागत कक्ष, बैठक कक्ष, योग अभ्यास कक्षदेखि भान्सा कोठासम्मको व्यवस्था छ ।हाल सरकारले धापाखेलको डाउनटाउन अपार्टमेन्टमा प्रदेश प्रमुख तथा मुख्यमन्त्रीहरुका लागि मासिक ७ लाख रुपैयाँ भाडामा लिएर प्रयोग गर्न दिएको छ । अब उनीहरु भैंसेपाटी सर्नेछन् ।
कतिपयले प्रदेशका नाममा अनावश्यक खर्च गरिएको बताएका छन् भने कतिको धारणा प्रदेशमा समेत यत्तिको सुविधासम्पन्न आवास नभएका बेला काठमाडौंमा अनावश्यक भवन बनाएर खर्च बढाइएको टिप्पणी गरेका छन् ।
कूल सात वटा डुप्लेक्स छन्। जसअनुसार एउटा भवनलाई विभाजन गरेर एकातिर मुख्यमन्त्री र अर्कोतिर प्रदेश प्रमुखको लागि व्यवस्था गरिएको छ । एउटा मात्रै भवन बनाउन झन्डै १२ करोड खर्च भएको महर्जनले बताए । पहिलो तलामा रिसेप्सन,सचिवालय र मिटिङ हलका लागि व्यवस्था गरिएको छ भने दोस्रोमा निवास, अध्ययन कक्ष, योगा र भान्छा कोठा छ। तेस्रो तलामा पाहुना कक्ष राखिएको छ ।
निर्माणको ठेक्का ०७६ असोज २७ मा भएको थियो । यसको ठेक्का केसी–समानान्तर जेभीले ७२ करोड ४७ लाखमा लिएको हो। आवाससँगै सुरक्षा भवन, इन्टेरियरलगायत सबैको काम सकिएर आवास हस्तान्तरण गरिएको आयोजनाले जनाएको छ ।
