काठमाडौं ।
शक्ति समूहकी अध्यक्ष चरीमाया तामाङले मानव बेचबिखनमा संलग्न अपराधीलाई राजनीतिक दलले बचाइरहेको आरोप लगाउनुभएको छ ।
अन्तर्राष्ट्रिय मानव बेचबिखन विरुद्धको १७औं दिवसको अवसरमा अखिल नेपाल महिला संघ (अनेमसं)ले आज बुधबार राजधानीमा आयोजना गरेको‘मानव बेचबिखनको अवस्था र न्युनीकरण अन्तरक्रिया’मा तामाङले मानव बेचबिखनमा संलग्न अपराधीलाई खबरदारी गनुपर्ने राजनीतिक दलले उल्टै बचाउन खोज्ने आरोप लगाउनुभएको हो ।
मानव बेचबिखन एउटा जघन्य अपराध भएको बताउँदै तामाङले अन्तर्राष्ट्रिय जगतमै यसको जालो फैलिएको स्प्ष्ट पार्नुभयो । १६ वर्षको उमेरमा भारतमा बेचिएको दुई वर्षपछि उद्धार गरी नेपाल फर्काइएकी सिन्धुपाल्चोककी तामाङको सकृयतामा स्थापना गरिएको संस्था शक्ति समूहले २०१७ देखि पीडितहरुको उद्धार गर्दै आइरहेको छ ।
यस्तै कार्यक्रममा सामाजिक अभियन्ता गौरी प्रधानले पछिल्लो समय मानव बेचबिखनको सिकार महिलामात्रै नभई पुरुष पनि हुने क्रम बढीरहेको बताउनुभएको छ । यस्तै प्रधानका अनुसार शिक्षित व्यक्तिहरु बढी मात्रामा मानव बेचबिखनमा परिरहेका छन् ।
कार्यक्रममा सहभागीहरुले आजको अवस्थासम्म पनि मानव बेचबिखन न्युनीकरण नहुनु निकै दुखद कुरा भएको भन्दै चिन्ता व्यक्त गरेका छन् । साथै उनीहरुले मानव बेचबिखन न्युनीकरणका लागि सबै आ–आफ्नो ठाउँबाट एकजुट भएर लाग्नुपर्नेमा जोडि समेत दिएका छन् ।
संयुक्त राष्ट्रसंघका अनुसार विश्वव्यापी संकट, द्वन्द्व र जलवायु परिवर्तनका कारण मानव बेचबिखनको रुप विकराल बनेको छ ।
गरिबी, बेरोजगारी, शिक्षा र स्वास्थ्यमा पहुँच नभएका, भेदभाव, हिंसा, दुर्व्यवहारमा परेका व्यक्ति एवं सीमान्तकृत समुदाय मानव तस्करको नजरमा पर्ने गरेका छन् । संयुक्त राष्ट्रसंघ अन्तर्गतको लागुऔषध र अपराधसम्बन्धी कार्यालयका अनुसार विकासशील राष्ट्रहरूमा मानव बेचबिखनप्रतिको प्रतिक्रिया घट्दै गएको छ ।
सन् २०२० मा मानव बेचबिखन पत्ता लगाउने दर ११ प्रतिशतले घटेको र मावन बेचविखनविरुद्ध सजायको दर २७ प्रतिशतले घटेको थियो । पछिल्लो समय एसिया, अरब, अफ्रिका, युरोप र अमेरिकाका विभिन्न मुलुकमा समेत बेचबिखन तथा ओसारपसार हुन थालेको छ ।
अनेमसंघ कार्यवाहक अध्यक्ष सुमित्रा विसीको अध्यक्षतामा सम्पन्न कार्यक्रममा उपाध्यक्ष सर्मिला कार्की, उपमहासचिव शान्ति अधिकारी, महिला हिंसा विरुद्धको अभियान कमिटीका प्रमुख लक्ष्मी कार्की, सचिव नानीमाया थापा, सदस्य निशाकुशुम भण्डारी, पेशागत महासंघका अध्यक्ष पुण्य ढकाल लगायत जनसंगठनका प्रमुख एवम् प्रतिनिधिहरुले मानव वेचविखन न्युनीकरणका लागि महत्वपूर्ण सुझाव राखेको अनेमसंकी प्रचार विभाग प्रमुख कालिका पाठकले जानकारी दिनुभयो ।
