काठमाडौँ ।
नेकपा एमालेको प्रथम बागमती प्रदेश अधिवेशनको लोगो सार्वजनिक गरिएको छ । एमालेको बागमती प्रदेश कमिटीको प्रथम अधिवेशन आगामी असोज ८ र ९ गते काठमाण्डौँमा आयोजना गरिँदै छ । कमिटीको प्रचारप्रसार समितिले निर्माण गरेको लोगो पदाधिकारी र इन्चार्जको सुझावअनुसार टुंगो लगाइएको प्रचार तथा प्रकाशन विभाग प्रमुख महेश बर्तौलाले जानकारी दिनुभयो ।
लोगोमा बागमती प्रदेश भित्रका हिमाल, पहाड र तराइको भूभाग दर्शाउने आकृति, यहाँका सांस्कृतिक, धार्मिक पहिचानका संकेतहरु र जातजाती, भेषभूषा, जीवजन्तु साथै यहाँको परिवर्तन र विकास गर्न प्राण आहूती गरेका शहीदहरुको स्मरण गरिएको छ । अब समृद्ध बागमती प्रदेश निर्माणका लागि एमालेकै नीति र नेतृत्व आवश्यक छ, भन्ने झल्काउन एमालेको झण्डा र चुनाव चिन्ह सूर्य सजाइएको प्रमुख बर्तौलाले बताउनुभयो ।
असोज ८ मा उद्घाटन हुने यो अधिवेशनलाई एमालेले राष्ट्रिय महाधिवेशनको झल्को दिनेगरी तयारी गरिरहेको छ । राजधानी सहर समेत जोडिएको यस प्रदेशमा उद्घाटनका बेला मानवसागर उतार्ने तयारी भइरहेको अध्यक्ष केशव पाण्डेको भनाइ छ ।
नयाँ नेतृत्व छनौट गर्ने यस अधिवेशनमा नेतृत्व हात पार्न नेताका पुराना तथा नयाँ अनुहारहरु दौडधुपमा लागेको बुझिन आएको छ ।
