काठमाडौं । शिक्षा, विज्ञान तथा प्रविधि मन्त्रालयले आन्दोलनको घोषणा गरेको नेपाल शिक्षक महासंघलाई वार्तामा आउन आग्रह गरेको छ । संसदमा दर्ता भएको शिक्षा विधेयकका विरुद्धमा असोज ३ गतदेखि आन्दोलनको घोषणा गरेको महासंघलाई मन्त्रालयले वार्तामा आउन आग्रह गरेको हो ।

शिक्षा सचिव सुरेश अधिकारीले विद्यालय बन्द लगायतका आन्दोलनका कार्यक्रम फिर्ता लिएर वार्तामा आउन आग्रह गरिएको बताए । विधेयक संसदमा दर्ता भइसकेको अवस्थामा संशोधनमा जान सकिने बाटो खुला नै छ । मन्त्रालयको हातमा नरहेको विषयमा महासंघले लाखौं विद्यार्थीको पठनपाठन अवरुद्ध गर्ने गरी आन्दोलनको कार्यक्रमको घोषणा गरेको छ ।

यसैबिच आन्दोलन शिक्षकहरूले सरकारले असोज २ गते पहिलोपटक मनाउन लागिएको राष्ट्रिय शिक्षा दिवस बहिष्कार गर्ने भएका छन् । बिभिन्न सामाजिक संजाल मार्फत देशभरबाट दुरदराजका शिक्षकहरुले आन्दोलनको घोषणा गरेको आफ्ना शिक्षक महासंघलाई मााग पुरा नभएसम्म कुनै किसिमको संझौता नगर्न खबरदारी गरिरहेका छन् ।