काठमाडौँ ।शिक्षकहरुको विशाल सहभागिता रहेको शिक्षक आन्दोलनलाई बिद्यार्थीका अभिभावक तथा बिभिन्न संघ/संस्थाहरुले समर्थन जनाउने क्रम जारी छ भने, शिक्षकहरूको आन्दोलनका कारण आज पनि काठमाडौंको ट्राफिक व्यवस्थापन अस्तव्यस्त बनेको छ। माइतीघर मण्डलादेखि नयाँ बानेश्वरसम्म चल्ने सडकमा सवारीसाधन चलेका छैनन्।
शिक्षकहरूको ठूलो भीडका कारण सार्वजनिक सवारीसाधन नचल्दा सर्वसाधारणहरू हिँडेर गन्तब्यमा पुग्नु परेको छ । संसदमा दर्ता भएको विद्यालय शिक्षा विधेयक विरुद्ध हिजो पनि आन्दोलन हुँदा सवारीसाधन सञ्चालन अस्तव्यस्त बनेको थियो।
नेपाल शिक्षक महासङ्घका अनुसार आज माइतीघर मण्डलादेखि नयाँ बानेश्वरसम्म विरोध प्रदर्शन हुने छ। देशभरबाट एक लाख भन्दा बढी शिक्षकहरू आन्दोलनमा सहभागी भएको शिक्षक महासङ्घका महासचिव लक्ष्मी किशोर सुवेदीको दाबी छ।
शिक्षकहरुको विशाल सहभागिता रहेको शिक्षक आन्दोलनलाई बिभिन्न संघ/संस्थाहरुले समर्थन जनाउने क्रममा, नेपाल निजामती कर्मचारी युनियनले पनि एक बिज्ञप्ती मार्फत समर्थन जनाएको छ । युनियनका महासचिब जनक रावलद्वारा हस्ताक्षर गरिएको बिज्ञप्तीमा भनिएको छ, “ आर्थिक सामाजिक मानविय लगायत सर्वागिण पक्षको बिकासको आधारको रुपमा रहेको शिक्षा क्षेत्र र सबै भन्दा बढी मर्यादित एवम् प्रतिष्ठित बनाउनु पर्ने शिक्षण पेशा उपेक्षित हुनु दुखद बिषय हो। शैक्षिक क्षेत्रको सुधारका लागी सरकार आफै अग्रसर हुनुपर्नेमा शिक्षकहरु नै आन्दोलनमा जानुपर्ने बाध्यात्मक अवस्था आउनु सामान्य बिषय होईन” ।
“यसै बिच सामाजिक संजालको प्रयोग गर्दै देशका कुना-कुनाबाट बिद्यार्थीका अभिभावले समेत शिक्षक आन्दोलनलाई पुर्ण समर्थन र सफलताको शुभकामना दिईरहेका छन्”, एक आन्दोलनरत शिक्षकले जानकारी दिनु भयो।
