पर्वत । दसैँका बेला राम्रो व्यापार हुने च्याङ्ग्राको मूल्य आकासिएको छ । ४ वर्षको अवधिमा मूल्य दोब्बर भन्दा बढी भएको छ । ४ वर्षअघि एउटा च्याङ्ग्रा २५ हजार हाराहारीमा बिक्री हुन्थ्यो । यो वर्ष एउटैलाई ५५ हजार भन्दा बढी मूल्य पर्ने व्यवसायीहरूले बताएका छन् । हिमाली क्षेत्रमा पालिने च्याङ्ग्रा स्वाद र स्वास्थ्यका हिसाबले राम्रो मानिन्छ । त्यसैले च्याङ्ग्रा संस्कृति पोखराले औधी रुचाएको छ ।

पोखरामा दसैँका लागि बिक्री गर्न व्यापारीहरूले च्याङ्ग्रा मुस्ताङबाट झार्न थालेका छन् । जोमसोमबाट हालसम्म ५ हजार हाराहारी च्याङ्ग्रा पोखराका लागि हिँडाइएका भेटेरिनरी अस्पताल तथा पशु सेवा विज्ञ केन्द्र मुस्ताङले जनाएको छ । यो वर्ष ८ हजार जति भेडा च्याङ्ग्रा पोखराको बजारबाट बिक्री हुने अनुमान गरिएको छ । प्रायः भेडाच्यांग्रा मुस्ताङबाट आयात हुन्छ । यस वर्ष ४ हजार भेडाच्यांग्रा डोल्पाबाट पनि आयात भएको छ ।

अघिल्लो वर्ष भन्दा अहिले बढी भेडाच्यांग्रा बिक्री हुनेछ । व्यापारीहरु अघिल्लो साता नै भेडाच्यांग्रा खरिदका लागि मुस्ताङ पुगेका र गोठ गोठमा चहार्ने गरेका केन्द्रका निमित्त प्रमुख ऋषिराम पोखरेलले बताए । कोरोनाकाल अघिसम्म तिब्बतबाट भेडाच्यांग्रा आयात हुन्थ्यो । पछिल्लो ४ वर्ष कोरला नाका ठप्प छ । त्यसैले नेपालभित्रका भेडा च्याङ्ग्रा मात्रै बेच्ने गरिएको छ । पोखरा झार्ने भेडाच्यांग्राको जोमसोममै स्वास्थ्य परीक्षण गर्ने गरिएको विज्ञ केन्द्रले जनाएको छ । अस्वस्थ भेडाच्यांग्रा बिक्री गर्न रोकिने भेटेरिनरी डाक्टर लालमणि अर्यालले जानकारी दिए । ठाउँ ठाउँमा स्वास्थ्य जाँच हुने र पोखरा आएपछि पनि थप जाँच गरेर स्वस्थलाई मात्रै बिक्री गर्न दिइने छ ।