काठमाडौं । माओवादी केन्द्रको केन्द्रीय सचिवालय बैठकमा हिन्दु राष्ट्रको एजेन्डाले प्रवेश पाएको छ । बहुसंख्यक नेपाली हिन्दु भएका कारण नेपाल हिन्दु राष्ट्र बन्नसक्नेबारे सोच्नुपर्ने बताएपछि नेताहरु तरंगित भएका थिए ।

बैठकमा सहभागी पम्फा भुसालले नेपाल हिन्दु राष्ट्र बन्नसक्ने धारणा राखेकी थिइन्। उनले धरान, मलंगवा र नेपालगञ्जमा साम्प्रदायिक भड्काव आएकोतर्फ देखाउँदै नेपाललाई हिन्दु राष्ट्र घोषणा गर्नेबारे अगाडि बढ्न सुझाव दिएकी थिइन् । नेतृ भुसालको सुझावपछि नेताहरुले यसबारे आफ्ना धारणा राखेका थिए । बैठक तरंगित भए पनि अध्यक्ष प्रचण्ड भने यसबारे चुपै लागेका थिए ।

समसामयिक विषयमा छलफल गर्न बोलाइएको बैठकमा आकस्मिक रुपमा हिन्दु राष्ट्रको एजेन्डाले प्रवेश पाएपछि बैठकको माइन्युटिङ पनि नभएको एक सहभागी नेताले जानकारी दिए । नेतृ भुसालले नेपाललाई हिन्दु राष्ट्र बनाउन र त्यसो गर्न नसकिए यसबारे जनमत संग्रहमा जानसमेत नेतृत्वलाई सुझाव दिएकी थिइन् ।