काठमाडौं । जनकपुरमा कटुवा पेस्तोलसहित एकजना भारतीय नागरिक पक्राउ परेका छन् । पक्राउ पर्नेमा भारतको लखी शेराई जिल्लाको पप्पु सहनीको अन्दाजी १६ वर्षीया छोरी पुजा कुमारी सहनी रहेको प्रहरीले जनाएको छ ।
जनकपुरधाम उपमहानगरपालिका-१ रेल्वे स्टेशनस्थित हनुमान मन्दिरको प्राङ्गणबाट उनलाई मङ्गलवार साँझ रेल्वे सुरक्षा बेसबाट खटिएको प्रहरी टोलीले पक्राउ गरेको हो ।
विशेष सूचनाका आधारमा खटिएका रेल्वे प्रहरीले मन्दिरको प्राङ्गणमा लुकीछिपी बसिरहेकी अवस्थामा एक थान कटुवा पेस्तोल, नेपाली ६५ रुपैयाँ, एक थान भारतीय सिमकार्ड र चाँदीको जस्तो देखिने लकेटसहित नियन्त्रणमा लिएको सशस्त्र प्रहरी धनुषाका उपरीक्षक दिनेश मल्लले जानकारी दिए ।
रेल्वे सुरक्षा बेसका प्रहरी नायब उपरीक्षक खड्क बहादुर शाहीका अनुसार दुई दिनदेखि पेस्तोल लिएर घुमफिर गरिरहेको जानकारी आएपछि टोली खटाइएको थियो। हामीले खोजबिन गर्दै जादा मङ्गलवार साँझ पौने आठ बजेतिर उनलाई मन्दिरबाट नियन्त्रण लिएको उनले बताए ।
भारतको जयनगरबाट रेल चढेर जनकपुर आएकी हुन् ती किशोरीले होटलमा खाना खाने पैसा दिनेबेला पेस्तोल देखाएर तर्साउने गरेको प्रहरीको प्रारम्भिक अनुसन्धानबाट खुलेको सशस्त्र प्रहरी नायब उपरीक्षक शाहीले बताए ।
उनलाई नियन्त्रणमा लिई आवश्यक कारबाहीको लागि रेल्वे सुरक्षा बेश जनकपुरधाममा राखी अनुसन्धान सुरु भएको शाहीले बताए ।
