काठमाडौं । बंगलादेशको गार्मेन्ट कारखानामा काम गर्ने हजारौं कामदारले विरोध प्रदर्शन गरिरहेका छन् । यी कामदारहरू पश्चिमी देशका प्रमुख ब्रान्डका कपडा बनाउने कारखानामा काम गर्छन् ।

ज्याला वृद्धिको माग गर्दै राजधानी ढाकामा आन्दोलनरत मजदुरले सडक अवरुद्ध गरेका छन् । त्यहाँका कपडा कारखानामा पनि तोडफोड भएको खबर आएको छ ।

ढाकाको बाहिरी भागमा रहेको औद्योगिक क्षेत्रमा भेला भएका आन्दोलनकारी मजदुरहरूलाई नियन्त्रण गर्न प्रहरीले अश्रुग्यास र पानीको फोहोरा प्रयोग गरेको थियो । सोमबारदेखि सुरु भएको आन्दोलनमा दुई मजदुरको मृत्यु भएको छ ।

आकासिएको महंगीले राम्ररी बाँच्न नसकेको भन्दै मजदुर आन्दोलनमा उत्रिएको ट्रेड युनियन नेताहरुको भनाइ छ ।

बंगलादेशका यी कपडा कारखानाहरूमा काम गर्ने कामदारहरूको औसत मासिक तलब लगभग ७५ डलर छ । ट्रेड युनियनहरू यो न्यूनतम ज्याला २०८ डलरमा वृद्धि गर्न चाहन्छन् ।