काठमाडौं । जाजरकोट केन्द्रबिन्दु बनाएर शुक्रबार राति गएको भूकम्पले जाजरकोट र रुकुम पश्चिमका गरी कुल एक सय ४७ विद्यालयमा पूर्ण क्षति गरेको छ । दुवै जिल्लामा गरी ७८ बालबालिकाको मृत्यु भएको छ । जसमध्ये ६७ बालबालिका विद्यालयमा अध्ययनरत रहेको कर्णाली प्रदेश कायममुकायम सचिव चूडामणि पौडेलले बताए ।

कामु सचिव पौडेलका अनुसार हालसम्म करिब २० हजार घरमा क्षति पुगेको र त्यसमध्ये पनि आठ हजार घर पूर्ण रूपमा क्षतिग्रस्त भएको तथ्यांक छ । कर्णाली प्रदेश सरकारले तथ्यांक संकलन गर्ने कार्य थप व्यवस्थित र तीव्र बनाएको उनले जनाए ।

प्राप्त तथ्यांकअनुसार जाजरकोटमा ८५ र रुकुम पश्चिममा ६२ गरी कुल एक सय ४७ विद्यालयमा पूर्ण क्षति पुगेको तथ्यांक प्राप्त भएको छ । त्यस्तै जाजरकोटमा ८० र रुकुम पश्चिममा दुई सय ६८ गरी कुल तीन सय ४८ विद्यालयमा आंशिक क्षति भएको छ । दुवै जिल्लामा गरी एक शिक्षकको मृत्यु भएको छ भने ७१ विद्यार्थी घाइते छन् ।

‘हालसम्म प्राप्त तथ्यांकअनुसार एक सय ५३ जनाको मृत्यु भएको छ । जसमध्ये ७८ बालबालिका छन् भने विद्यालयमा अध्ययनरत ६७ विद्यार्थी छन्,’ कामु सचिव पौडेलले भने, ‘जाजरकोट र रुकुम पश्चिममा अझै पनि कुन समयमा कस्तो प्राकृतिक विपत्ति आइलाग्ने हो टुंगो छैन, निकै त्रासपूर्ण वातावरण छ ।’ प्रदेश सरकारले शैक्षिक क्षतिबारे तथ्यांक संकलन गर्ने काम जारी राखेको छ ।

‘२०७२ सालको महाभूकम्पको अनुभव हामीसँग छ। तिहारपछि टिएलसी निर्माण गरी कक्षाकोठामा पठनपाठन सुरु हुन्छ,’ उनले भने, ‘एजुकेसन क्लस्टर लिने काम जारी नै छ । राहत, विद्यालय पुनर्निर्माण र पुनव्र्यवस्थापनको कार्य हामीलाई चुनौती थपिदिएको छ ।’ तिहारलगत्तै पूर्ण क्षति भएका विद्यालयमा अस्थायी टहरा (टिएलसी) निर्माण गरी कक्षा सञ्चालन गर्ने तयारी प्रदेश सरकारको रहेको उनले जनाए ।