हतार-हतार न्युज रुममा छिरेर शिशिर दाई सहकर्मीलाई भन्दै हुनुहुन्छ, “समा, आजको वालेन न्यूज थाहा छ, वालेनको मर्यादा घटाउदै छ सरकारले, न्युज छिटो टाईप गरिहाल्नुस त । मान्छेलाई मान्छे नगन्ने, कसैलाई नटेर्ने झन हामीलाई त शत्रु नै ठान्ने, जे गर्यो ठिक गर्यो सरकारले”। दरवारका नेता रिसाएका छन, ठेक्का र पट्टाका पत्रकार रिसाएका छन, झोलाका व्यापारी र खोलाका सुकुम्वासी रिसाएका छन, लोकतन्त्रमा जनताले चाहेर मात्रै कहां हुन्छ र बालेन, तिम्रो मर्यादा त घट्नै पर्छ नि !
काठमाडौं देशको राजधानी मात्रै होईन, धर्म संस्कृती र संस्कार झल्काउने शहर यो, ललितकला र बास्तुकला देखाउने शहर हो, राजनीतिले यि सब जोगाउन सक्दैन भने, भो राजधानी अन्तै लानुस्, हामिलाई हाम्रो सुन्दर काठमाडौं चाहिएको छ, भन्दै जनताको आवाज बोल्ने, तिम्रो मर्यादा त घट्नै पर्छ नि, वालेन ।
सडकका डिभाईडर आफै उठाउनु पर्ने, बैठकका दृश्य प्रतक्ष्य देखाउनु पर्ने, वोलि मुसाका जस्तै भएर के भो र काम सिंहका जस्तै गर्ने तिमीलाई, लोकतन्त्रमा, जनताले वालेन हाई-हाई गरेर मात्रै कहां हुन्छ र वालेन, तिम्रो मर्यादा घट्नै पर्छ नी !
वल्लो कोठामा शिकारले सिठ्ठी बजाएको सुन्दै, पल्लो कोठामा आलो सुत्केरी भोक-भोकै सुत्नु पर्ने मानवता मरेको शहरमा, सुत्केरीलाई पोषण दिने, यति मात्रै कहां हो र, निधारमा रातो टिका लगाउने र मन्दिर परिक्रमा गर्नेहरुलाई पाखे देख्ने आधुनिक शहरमा, धर्म संस्कृती र संस्कार जोगाउनु पर्छ है भन्दै, गरिबलाई किरिया खर्च दिने तिम्रो मर्यादा त घट्नै पर्छ नी वालेन ।
वाटोमा अलपत्र गाईलाई कान्जि हाउस लगेका छौ, आफ्नै दाजु-भाईले लगाएका फुल किन्नु पर्छ है भनेका छौं, सुरक्षा त सरकारले दिने हो नि, रातभरी भैलो खेल्न पाउनु पर्छ भन्दै जनताले चाहेको रीति-रिवाज जोगाउने तिम्रो मर्यादा त घट्नै पर्छ नी वालेन ।
टाढाको कुरै नगरौ, काठमाडौकै (१,६,७,८,९,) पाच-पाच निर्वाचित साम्सदको भोट जोड्दा पनि भेट्टाउन नसक्ने, ६१७६७ लोकप्रिय मत पाएर, लोकतन्त्रमा जनताले असाध्यै रुचाएका, तिम्रो मर्यादा नघटेर कसको घट्छ त वालेन ।
प्रतिष्ठाको बिषय बनेको सामाजिक संजालको जमानामा, पुर्व प्रमहरु बल्ल-बल्ल २/४ लाख फलोअर्स लिएर घिटी-घिटी भईरहेको बेला, १८-२० लाख फलोअर्सका साथ, सानसंग संञ्जालमा छाउने तिम्रो मर्यादा त घट्नै पर्छ नि वालेन ।
छोराको शालिक उद्घाटन गरेको तस्विर फेसबुकमा राख्दा हजार लाईक पाउन दिनभरी कुर्ने गणतन्त्रका दिग्गजहरु, सिंहदरवारमा आगो लगाईदिने तिम्रो पोस्टले क्षणभरमै संजालमा रांको वालिदिन्छ भने तिम्रो मर्यादा त घट्नै पर्छ नि वालेन ।
लोकतन्त्रमा, कार्यकर्ताले ताला लगाउने, विद्यार्थीले पढ्न नपाउने, ताला लाउनेलाई हेडसरले माला लगाईदिने स्कुलमा, शान्ति क्षेत्र हो विद्यालय, राजनीति बन्द गर भन्ने तिमीलाई मर्यादा त घटाउनै पर्छ नि वालेन ।
