दाङ । लुम्बिनी प्रदेश सरकारले आगामी फागुन २७, २८ र २९ गते बुद्ध जन्मस्थल लुम्बिनीमा चौथो शिखर सम्मेलन गर्न तयारी अघि बढाएको छ । लुम्बिनीका मुख्यमन्त्री डिल्लीबहादुर चौधरीले विशेष चासो दिएको सम्मेलनमा बालबालिकाको हित, दिगो विकास र शान्तिका लागि ‘लरेट्स एन्ड लिडर्स’ नाममा सम्मेलन आयोजना गर्न लागिएको हो ।
लुम्बिनी सरकारले आर्थिक वर्ष २०८०/०८१ वार्षिक नीति तथा कार्यक्रम र बजेटमै शिखर सम्मेलनलाई समेटेको छ । सम्मेलनका लागि लुम्बिनी विकास कोष, पर्यटन व्यवसायी र प्रदेश सरकारमातहतका विभिन्न कार्यालय र निकायसँग गृहमन्त्री एवं सरकारका प्रवक्ता सन्तोषकुमार पाण्डेयको छलफल गरिसकेका छन् ।
शिखर सम्मेलनमा विभिन्न राष्ट्रका २० जना नोबेल शान्ति पुरस्कार विजेता कैलाश सत्यार्थीसहित बालबालिका, शान्ति क्षेत्रका विज्ञ, सरकारी तथा गैरसरकारी अधिकारी र सरोकारवाला सहभागी हुने भएकाले प्रारम्भिक गृहकार्य अगाडि बढाइएको पाण्डेयले बताए । कैलाश सत्यार्थी सन् २०१४ मा नोबेल शान्ति पुरस्कार पाएका थिए ।
शान्ति, सद्भाव र करुणको सन्देश जाने एवं विश्वभर लुम्बिनी क्षेत्रको पर्यटकीय प्रवर्द्धन हुने सम्मेलनको उद्देश्य रहेको छ । सम्मेलनलाई लुम्बिनी प्रदेशको आर्थिक समृद्धिमा टेवा पुग्ने विश्वास गरिएको छ ।
सम्मेलनलाई सफल बनाउन संघीय सरकारका परराष्ट्रमन्त्री एनपी साउदको संयोजकत्वमा लुम्बिनी प्रदेशका मुख्यमन्त्री डिल्लीबहादुर चौधरी सदस्य रहेको १३ सदस्यीय उच्चस्तरीय समन्वय समिति गठन गरिएको प्रदेश सचिव सुमन घिमिरेले बताए ।
मुख्यमन्त्री चौधरीको संयोजकत्वमा निर्देशक समिति, प्रदेश अर्थमन्त्री धनबहादुर मास्कीको संयोजकत्वमा स्रोत समन्वय तथा सहजीकरण समिति, गहृमन्त्री सन्तोषकुमार पाण्डेयको अध्यक्षतामा सुरक्षा समिति, पर्यटन विकास परिषद्का कार्यकारी निर्देशकको संयाजकत्वमा अतिथि सत्कार आवास समिति, पर्यटन डिभिजन कार्यालय रुपन्देहीका डिभिजन प्रमुखको संयोजकत्वमा यातायात व्यवस्थापन समिति, गृह मन्त्रालय सूचना तथा सञ्चार मन्त्रालयका उपसचिवको संयोजकत्वमा सञ्चार तथा प्रचारप्रसार समिति गठन गरिएको छ ।
सम्मेलनको लागि प्रारम्भिक तयारी साउनबाटै सुरु भए पनि कार्यक्रमको मोडलको तयारीमा जुटेको घिमिरेले बताए । सम्मेलनमा विभिन्न विचारमूलक छलफल हुनेछ ।
लुम्बिनी विकास कोषका कोषाध्यक्ष सिद्धिचरण भट्टराइले विभिन्न राष्ट्रका नोबेल शान्ति पुरस्कार विजेता सहभागी हुने भएकाले लुम्बिनीको विश्वमाझ थप प्रचार हुने बताए ।
