काठमाडौं । प्रधानमन्त्री पुष्पकमल दाहाल ‘प्रचण्ड’ ले सहयोगापेक्षी सडकआश्रित मानवहरूको समुचित व्यवस्थापन हुनेगरी आगामी संसद् अधिवेशनमा विधेयक पेस गर्ने प्रतिबद्धता व्यक्त गर्नुभएको छ । मानव सेवा आश्रमले सोमवार काठमाडौँमा आयोजना गरेको एक कार्यक्रममा बोल्दै प्रधानमन्त्री दाहालले सो कुरा बताउनुभएको हो ।
मानव सेवा आश्रमलाई सहयोगापेक्षी सडक मानव उद्धारका लागि अति आवश्यक पर्ने भवन, जग्गा, वाहनलगायतका सेवा उपलब्ध गराउन पनि सरकार प्रतिबद्ध रहेको पनि प्रधानमन्त्री दाहालले बताउनुभयो । उहाँले त्यस अवसरमा सबै प्रदेशमा एक–एक वटा सडकआश्रित मानव उद्धारका लागि आजबाट सञ्चालनमा आउनेगरी सवारी साधन उपलब्ध गराउने घोषणा समेत गर्नुभयो । प्रधानमन्त्री दाहालले सडक मानव मुक्त बनाउने नेपाल सरकारको घोषणा पूरा गर्न एक महिनाभित्र मन्त्रीपरिषद्बाट ठोस योजना बनाई अघि बढ्ने सङ्कल्प समेत गर्नुभयो ।
उहाँले भन्नुभयो, ‘बेवारिसे, असहाय, अशक्त, जोखिममा परेका, मानसिक असन्तुलन भएका, सहयोगापेक्षी सडक आश्रित मानिसको समुचित व्यवस्थापन गर्न आउँदो सङ्घीय अधिवेशनसम्म नेपाल सरकारले सोसम्बन्धी विधेयक तयार गरी पेस गर्ने प्रतिबद्धता व्यक्त गर्न चाहन्छु ।’ सङ्घ, प्रदेश र स्थानीय तहका सहयोगापेक्षी सडक मानव व्यवस्थापन गर्न आफ्नो तर्फबाट कार्यक्रम तथा बजेट व्यवस्थापन गर्न आवश्यक पहल र समन्वय गर्ने कुरा पनि म तपाईँहरूको अगाडि प्रतिबद्धता व्यक्त गर्नुभयो ।
मानव सेवा आश्रमलाई सरकारी तथा सार्वजनिक जग्गा, भवनको प्रयोग तथा संरचना निर्माण, उद्धारलगायत अति आवश्यक सहयोग गर्न नेपाल सरकार प्रतिबद्ध रहेको उहाँले चर्चा गर्नुभयो । सबै प्रदेशमा अशक्तलाई ओसारपसार गर्ने गाडी उपलब्ध गराइने पनि उहाँले बताउनुभयो । सडक मानवमुक्त बनाउने नेपाल सरकारको घोषित उद्देश्य पूर्तिका लागि एक महिनाभित्र नेपाल सरकारको मन्त्रिपरिषद्बाट निश्चित योजना बनाइ अघि बढ्ने विश्वास उहाँले दिलाउनुभयो ।
प्रधानमन्त्री दाहालले प्रदेश र स्थानीय तहको सरकारलाई पनि सडक सहयोगोपेक्षी मानवहरूको उचित व्यवस्थापनका लागि आवश्यक बजेट तथा कार्यक्रमको व्यवस्थापन गर्न पनि आफूले समन्वय गर्ने बताउनुभयो । कार्यक्रममा उहाँले मानव सेवा आश्रमले मानवीय सेवाका लागि गरेको कार्यक्रममा निरन्तरताको पनि कामना गर्नुभएको थियो ।
