सुखमा रमाउन्जेल सबैको हात किन आउँछ ?
चाहिन्छ दुखमा साथ,औकात किन आउँछ ?

देख्छिन भोकले छटपटाएका छोराछोरी,
आमा रुन्छिन,सोच्छिन यो रात किन आउँछ ?

डढेलो लाग्दा घरमा,आएन कहिल्यै सम्झेर,
घरखेत बगाउन मात्रै वर्षात किन आउँछ ?

अन्तिममा बिस्तारा चिता नै हो थाहा छ,
छुट्याउछौ ठूलो सानो,जात किन आउँछ ?

अ ह! मान्दिन म,मेरा लागि केही छैन भनी
मिल्दा नजर, मुस्कानको सौगात किन आउँछ ?

पेट भरेर अन्न फाल्नेलाई कृपैकृपा छ
हे ईश्वर भोको पेटमा तेरो लात किन आउछ ?

(शिक्षक: बिशाल भट्टराई, कामना ईन्टरनेशनल स्कुल/कलेज, सानोभर्यांग काठमाडौं)