काठमाडौं । गत फाल्गुन ३ गते बुधवार खाना पकाउने (एलपी) ग्यासको सिलिण्डर विस्फोट भएर नेपाली कांग्रेसका नेता चन्द्र भण्डारी जलेर घाइते भएका थिए भने उनले सोहि घटनामा ८६ वर्षीया आमालाई गुमाएका थिए ।
नेपाली कांग्रेसका केन्द्रीय सदस्य चन्द्र भण्डारीले आफूसँग भएको घटना शङ्कास्पद रहेको बताएका छन् । त्यतीबेला आफूलाई केही थाहा नभए पनि उपचार पछि आएर बुझ्दा घटना शङ्कास्पद रहेको उनले बताए । घटनापछि पहिलो पटक कांग्रेसको जिल्ला सम्मेलनका लागी गृह जिल्ला गुल्मी पुगेका नेता भण्डारीले संसद्मा अभिव्यक्ति दिएकै दिन घटना घट्नु संयोग मात्र नभएको टिप्पणी गरे ।
‘त्यतीबेला त होस रहेन, म अचेत भएँ, ‘उनले भने, ‘आएर सबै कुरा बुझ्दा घटनामा प्रशस्त शङ्का गर्ने ठाउँ छ ।’
‘उपचारबाट फर्केपछि मैले प्रहरीसँग कुरा गरेँ। रेगुलेटर ठिकठाक रहेछ, सिलिण्डर पनि ठिकठाक छ । फलफूल ल्याएको जस्ताको त्यस्तै छ । अन्य किचनमा भएको अन्नपात ठिकठाक छन् । घरमा रहेका अन्य सदस्य पनि ठिकठाक छन्। आमा र म मात्र जल्यौँ। यो अलि ठिक देखिएन।’ उनले भने ।
घटना पछि अहिले आफू ठिक रहेको भन्दै नेता भण्डारीले जेनतेन बाँचेर आएको मान्छेलाई अब कुनै गल्ती गर्ने छुट नरहेको बताए । गुल्मेली जनताले अमूल्य मत दिएर आफूलाई सांसद बनाएर पठाएको भन्दै यहाँका जनताको विश्वास आफूले नतोड्ने उनको भनाई छ ।
‘मलाई झुट बोल्ने छुट छैन । कसैले भ्रष्टाचार गर्दा टुलुटुलु हेरेर बस्ने छुट पनि छैन, ‘उनले भने, ‘मर्दामर्दै बाँचेर फर्केको मान्छे, जनताको पक्षमा काम गर्छु ।’
काठमाडौंको बुद्धनगरस्थित निवासमा सिलिन्डर विस्फोट हुँदा उनी घाइते भएका थिए । घटनामा उनले ८६ वर्षीय आमा गुमाएका थिए ।
