काठमाण्डौ। त्रिभुवन विश्वविद्यालय, परीक्षा नियन्त्रण कार्यालय बल्खुमा बिहानैदेखि विद्यार्थीको लाइन लाग्छ । सर्टिफिकेट झिक्न, नाम थर बिग्रिएको सच्याउन, प्रतिलिपि निकाल्न, नम्बर सच्याउन लगाययका कामका लागि विद्यार्थी बल्खु पुग्छन् । तर दिनभर लाइनमा बस्दा पनि काम नहुने गरेको गुनासो विद्यार्थीहरूको छ । ‘पास गर्न सजिलो, सर्टिफिकेट झिक्न गाह्रो,’ दिनभर लाइनमा बसेका एक विद्यार्थी बुधबार दिउँसो ठूलो स्वरमा भन्दै थिए ।

उनी मात्र होइन, ठेलामठेल गर्दै लाइनमा बसेका विद्यार्थीको एउटै स्वर थियो । फारम भरेपछि बैंकको लाइनमा बस्नु पर्ने । पालो कुर्दाकुर्दै दिन जाने तर काम नहुने गरेको गुनासो विद्यार्थीको छ। बुधबार दिउँसो १ बजे परीक्षा नियन्त्रण कार्यालय बल्खु पुग्दा झ्याल झ्यालमा विद्यार्थीको लाइन थियो ।

तल गेटमा भने स्वतन्त्र विद्यार्थी युनियनले १० सुत्रीय माग राखेर ठूलो ब्यानर झुण्ड्याइरहेको थियो । पनिकाको बेथिति अन्त्य हुनुपर्ने माग राखेर त्रिविका विद्यार्थी नेता नारा लगाउँदै थिए । ‘विश्वविद्यालय पदाधिकारी जागिर हो कि जिम्मेवारी ? कुलपतिज्यू, राजनीतिक भागवण्डाबाहेक अरु बेला विश्वविद्यालय कहिल्यै सम्झिनुभएको छ ? परीक्षा उत्तीर्ण गर्न भन्दा प्रमाणपत्र लिन किन यति धेरै सास्ती ?,’ ब्यानर र नारा बनाएरै उनीहरू प्रश्न गरिरहेका थिए ।

त्रिविमा पदाधिकारी राजनीतिक भागवण्डाको आधारमा गर्न नहुने, शैक्षिक क्यालेन्डरको लागू गर्नुपर्ने, परीक्षा नियन्त्रण कार्यालयको सुधार गर्नुपर्ने लगायतका माग राखेर आन्दोलन सुरु गरिएको स्ववियु सभापति श्यामराज ओझाले बताए । ad100395-98af-425f-b5cc-
‘विश्वविद्यालयको सुधार, परीक्षा नियन्त्रण कार्यालयको सुधारको लागि डिजिटलाइजेसनको माग राखेका छौँ । पदाधिकारीको अकर्मण्यताका कारण आन्दोलन गर्न बाध्य भएका हौँ,’ उनले भने । प्रमाणपत्र पाउन विद्यार्थीले पाउनु परेको दुःखको अन्त्य गर्न आन्दोलन गरिएको उनी बताउँछन् ।

‘स्ववियु चुनावपछि परीक्षा नियन्त्रण कार्यालयमा आएर ढिलासुस्ती अन्त्य गर्न ज्ञापनपत्र बुझायौँ । तीन दिनभित्र प्रमाणपत्र उपलब्ध गराउने र अनलाइन प्रणालीमा लैजने भनियो तर अहिलेसम्म कार्यान्यवयन भएन,’ ओझाले भने ।

त्रिविको ६१ औँ ग्रेसलिस्टमा ७३ हजार विद्यार्थी थिए । प्रमाणपत्र बनाउन आउने विद्यार्थीको संख्या धेरै भएका कारण भिड भएको पनिकाको तर्क छ ।

‘विद्यार्थीको संख्या धेरै छ । दीक्षान्त समारोहलाई आधार मान्ने हो भने पनि वार्षिक ७३ हजारले प्रमाणपत्र लिन्छन्,’ सहायक परीक्षा नियन्त्रक पवन बराल भन्छन् । पनिका प्रविधिमैत्री हुन नसके कारण असहज भएको भने उनी स्वीकार गर्छन् । ‘आइटी फ्रेण्डली भएको भए सहज हुने थियो । कति काम विद्यार्थीले घरबाट गर्न सक्ने थिए,’ उनी भन्छन् ।अहिले आइटीको काम भइरहेको उनी बताउँछन् ।