काठमाडौं । नेपाल सुपर लिग (एनएसएल) को दोस्रो संस्करणमा एफसी बुटवल लुम्बिनी एफसीले पहिलो जित निकालेको छ । बुटवलले आइतबार सम्पन्न खेलमा स्पोर्टिङ इलाम डे मेची एफसीलाई २–१ ले हराएको हो ।
आइतबार त्रिपुरेश्वरस्थित दशरथ रंगशालामा सम्पन्न खेलमा बुटवललाई जित दिलाउन स्टेफन बिनोङ र कप्तान एरिक बिष्टले गोल गरे । इलामका अमाथ ड्वले गोल फर्काएका थिए ।
खेलको पहिलो हाफ गोलरहित बराबरीमा सकिए पनि ४९औँ मिनेटमा स्टेफन बिनोङले गोल गर्दै बुटवललाई अग्रता दिलाएका थिए । १८ यार्ड बक्स बाहिरबाट विनोङले नै बक्सभित्र लेफ्ट साइडका जिलेश्पीजंग कार्कीलाई खोजेका थिए । जिलेश्पीले निकालेको पासमा ६ यार्ड बक्सनजिक अनमार्क रहेका बिनोङले नै बललाई वान टचमा जालीको दिशा दिएका थिए ।
अमाथ ड्वले ७८औँ मिनेटमा गोल गर्दै इलामलाई खेलमा फर्काएपछि खेलले रोमाञ्चक मोड लियो । सन्तोष खत्रीले करिब ३५ यार्ड परबाट गरेको प्रहार इलामका गोलकिपर मोहम्मोदोउले बचाए पनि सो बल गोललाइन नजिक रोकिँदा पेनाल्टी बक्समा रहेका ड्वले सहजै जाली चुमाए ।
तर, ८८औँ मिनेटमा एरिक विष्टले उत्कृष्ट फ्रिकिक गोल गर्दै बुटवललाई पुनः अग्रतामा राखे । ३० यार्डभन्दा परको फ्रिकिकमा एरिकले सोझै टप कर्नर गोल गरे । यही गोल निर्णायक बन्दा बुटवलले पहिलो तीन अंक सुनिश्चित गर्यो ।
त्यसअघि खेलमा दुवै टिमले केही सुन्दर अवसरको सदुपयोग गर्न सकेनन् । खेलको तेस्रो मिनेटमै इलामलाई भाग्यले साथ दिएन । फरवार्ड फोडे कामराको सुन्दरको क्रसमा पेनाल्टी बक्समा रहेका भरत खवासले गरेको वान टच प्रहार पहिलो बारमा लाग्दै फर्किएको थियो ।
छैटौं मिनेटमा बुटवल लुम्बिनीका कप्तान एरिक बिष्टको प्रहार इलामका गोलकिपर विकेश कुथुका लागि गतिलो खतरा बन्न सकेन । मिडफिल्डर अब्डौल्जे बाले आशिष लामालाई ३५ यार्ड पर फाउल गरेपछि बुटवलले फ्रिकिक प्राप्त गरेको थियो । तर, मार्की खेलाडी एरिक विष्टको प्रहार इलामका गोलकिपर विकेश कुथुले सहजै बचाए ।
२६औँ मिनेटमा अमाथ ड्वले अवसर सदुपयोग गर्न नसक्दा इलामले अग्रताको मौका खेर फाल्यो । फोडे कामाराले राइट साइडमा उपलब्ध गराएको बल एक रक्षकलाई कटाउँदै ड्वले गरेको प्रहार माथिबाट बाहिरियो ।
५८औँ मिनेटमा फोडे कामाराले प्राप्त पेनाल्टी सदुपयोग गर्न नसक्दा इलामले खेलमा फर्किने सुनौलो मौका गुमायो । १८ यार्डभित्र अर्नेस्ट टाम्पीको ह्यान्ड भएपछि इलामले पेनाल्टी पाएको थियो । पेनाल्टी प्रहारका लागि आएका कामाराको प्रहार सही ‘जज’ गर्दै बायाँतर्फ बललाई बाहिर फ्याक्दै इलामको खेलमा फर्किने सम्भावनालाई विफल बनाए ।
७६औँ मिनेटमा इलामको आक्रमणमा पोस्ट बाधक बन्यो । राइट साइडबाट अमाथ ड्वले गरेको क्रसमा १८ यार्ड बक्सभित्र बुटवलका गौरब श्रेष्ठबाट डिफ्लेक्ट हुँदा पोस्टमा लागेर बाहिरिएको थियो ।
जितसँगै बुटवलले प्रतियोगितामा तीन खेलबाट तीन अंक जोडेको छ । यसअघि पहिलो खेलमा ललितपुरसँग २–० ले पराजित बुटवलले दोस्रो खेलमा धनगढीविरुद्ध पनि १–० को हार बेहोरेको थियो ।
प्रतियोगितामा इलामको भने यो दोस्रो हार हो । यसअघि उद्धघाटन खेलमा साविक विजेता काठमाडौं रेजर्ससँग १–० ले निराश बनेको इलामले दोस्रो खेलमा भने झापालाई १–० ले हराएको थियो ।
