काठमाडौं । निजी क्षेत्रको दूरसञ्चार सेवा प्रदायक एनसेलको विदेशी लगानीकर्ता आजियाटा लिमिटेडले बाहिरिने घोषणा गरेको छ । मलेसियन कम्पनी आजियाटाले एनसेलमा रहेको आफ्नो ८० प्रतिशत सेयर एक बेलायती कम्पनीलाई बेच्ने घोषणा गरेको हो ।
सन् २०१६ मा एक खर्ब ३६ अर्बमा किनेको कम्पनी आजियाटाले ६ अर्ब ६६ करोड रुपैयाँमा बिक्री गर्ने घोषणा गरेको छ ।
एनसेल खरिदबिक्रीबारे विभिन्न टीकाटिप्पणी भइरहेका छन् । यसबीच नेपालमा एनसेलको बजार हिस्सा कति छ भन्ने पनि चासोको विषय बनेको छ ।
नेपाल दूरसञ्चार प्राधिकरणका अनुसार एनसेल आजियाटा लिमिटेडको भ्वाइस टेलिफोन प्रयोगकर्ताको संख्या एक करोड ३२ लाख भन्दा बढी छ ।
प्राधिकरणको पछिल्लो तथ्यांक अनुसार भ्वाइस टेलिफोनका क्षेत्रमा एनसेलको बजार हिस्सा ३८.४८ प्रतिशत र नेपाल टेलिकमको ६१.५१ प्रतिशत रहेको छ ।
एनसेलको भ्वाइस टेलिफोन सेवा लिने ग्राहकको संख्या एक करोड ३२ लाख ५४ हजार ६४६ रहेको छ ।
यस्तै, नेपाल दूरसञ्चार कम्पनी लिमिटेड अर्थात् नेपाल टेलिकमसँग दुई करोड ५ लाख ६६ हजार ५१० भ्वाइस टेलिफोन प्रयोगकर्ता रहेका छन् ।
एउटै व्यक्तिले दुई वटा सिम कार्ड लिने गरेको हुँदा पनि यो संख्या जनसंख्या भन्दा बढी देखिन्छ ।
यस्तै, मोबाइल इन्टरनेटका क्षेत्रमा एनसेलको बजार हिस्सा ३१.६५ प्रतिशत र नेपाल टेलिकमको ६८.३५ प्रतिशत रहेको छ ।
इन्टरनेट सेवातर्फ एनसेलका थ्रीजी प्रयोगकर्ताको संख्या १७ लाख ९७ हजार ४८० रहेको छ । यस्तै, फोरजी प्रयोगकर्ताको संख्या ७० लाख ५६ हजार ९२५ रहेको छ ।
यसरी एनसेलका कुल इन्टरनेट प्रयोगकर्ताको संख्या करिब ८८ लाख ५४ हजार ३९५ रहेको छ ।
यस्तै, नेपाल टेलिकमका थ्रीजी र फोरजी गरी कुल इन्टरनेट प्रयोगकर्ताको संख्या एक करोड ९१ लाख १७ हजार ९२८ रहेको छ ।
जसमा थ्रीजी प्रयोगकर्ता ५९ लाख २० हजार ८१४ र फोरजी प्रयोगकर्ताको संख्या एक करोड ३१ लाख ९७ हजार ११४ रहेको छ ।
