काठमाडौं । काठमाडौं महानगरपालिकाले सुर्तीजन्य पदार्थको बिक्री वितरण र प्रयोगमा रोक लगाएको छ । हाललाई पूर्णरुूपमा निषेध गरी नियमनमा कडाइ गरिने महानगरले जनाएको छ ।
महानगरले बुधबार पत्रकार सम्मेलन गर्दै सुर्तीजन्य पदार्थको नियमनका लागि नगर प्रहरी, सादा पोसाकका प्रहरी र कर्मचारीसमेत तैनाथ गर्ने जनाएको छ ।
कहाँ के बेच्न र प्रयोग गर्न पाइँदैन ?
महानगर क्षेत्रभित्र कुनै पनि प्रकारका सुर्तीजन्य पदार्थ बिक्री, वितरण, भण्डारण र प्रयोग गर्न पाइने छैन । त्यसमा सुर्ती, खैनी, बिँडी, तम्बाखु, गुट्खा, पानपरागलगायत समेटिएको छ ।
साथै सार्वजनिकस्थलको एकसय मिटर वरपर यस्ता पदार्थ प्रयोग गर्नसमेत पाइने छैन । मठ मन्दिर, विद्यालय क्षेत्रलगायतका सार्वजनिकस्थलको एकसय मिटर वरपर सुर्तीजन्य पदार्थ बिक्री, प्रयोग र भण्डारणसमेत गर्न पाइने छैन ।
यस्ता क्षेत्रमा खुलारूपमा (खिल्लीमा) चुरोट बिक्री वितरण र प्रयोग गर्न पाइने छैन । “महानगर क्षेत्रभित्र कुनै पनि प्रकारका सुर्तीजन्य पदार्थ बिक्री वितरण भण्डारण गर्न पाइएन र चुरोटको हकमा कहीँ कतै पनि खुला बिक्री गर्न नपाइने नियम बनाइएको हो,” महानगरका स्वास्थ्य विभाग प्रमुख रामप्रसाद पौडेलले भने ।
नगर प्रहरीले निगरानी गर्ने सादा पोसाकमा समेत प्रहरी खटिने
सुर्तीजन्य पदार्थको बिक्री वितरण र प्रयोगमा नियमन गर्न महानगरले नगर प्रहरीलाई ३२ वटै वडामा खटाउने भएको छ । भोलिदेखि नै महानगरका चारवटा दिशामा १०–१० जनाका दरले नगर प्रहरी खटाइने महानगर प्रवक्ता नवीन मानन्धरले बताए ।
नियमविपरीत बिक्री वितरण भएको पाइए, पसल र गोदाम र भण्डारण गरिएका स्थानमा समेत छापा मारी कारबाही गरिने उनको भनाइ छ ।
सुर्तीजन्य पदार्थको नियन्त्रण र नियमन गर्ने ऐन, २०६८ मा उल्लेख भएबमोजिम स्थानीय सरकारको ऐनले प्रतिबन्ध लगाउन सक्ने व्यवस्थालाई टेकेर यस्तो निर्णय गरिएको महानगरले जनाएको छ ।
सुर्तीजन्य पदार्थको नियन्त्रण र नियमन गर्ने ऐन, २०६८ मा सार्वजनिक स्थलमा धूम्रपान वा सुर्तीजन्य पदार्थको प्रयोग गरेमा त्यस्ता व्यक्तिलाई सो स्थानबाट निकाल्ने, एकसय रुपैयाँ जरिवाना गर्ने वा दुवै सजाय हुन सक्ने व्यवस्था छ ।
त्यस्तै, धूम्रपान वा सुर्तीजन्य पदार्थको प्रयोग गरेमा त्यस्ता व्यक्ति सार्वजनिकस्थलसँग सम्बन्धित व्यक्ति वा कर्मचारी भएमा उसलाई विभागीय कारबाही समेत हुने व्यवस्था छ ।
नियमविपरीत सुर्तीजन्य पदार्थ बिक्री वितरण र प्रयोगसम्बन्धी कार्य गरेको पाइएमा तत्का महानगरको हटलाइन नम्बर १८१०५०००६० वा ०१५९०१७६३, ०१५९०१७६४ मा सूचना उपलब्ध गराउन पनि महानगरले अनुरोध गरेको छ ।
