काठमाडौँ । नेपाली कांग्रेसका नेता शेखर कोइरालाले नेपालमा बढिरहेको भ्रष्टाचारबारे विदेशीसमेत अचम्मित हुन थालेको बताएका छन् ।

‘आजभोलि हरेक विदेशी भेट्दा किन तिम्रो देशमा हरेक कुरामा भ्रष्टाचार हुन्छ भनेर सोध्छन् । के जवाफ दिने?,’ शुक्रबार मोरङको ललियामा कांग्रेसले आयोजना गरेको कार्यक्रममा नेता कोइरालाले भने, “अझै हामिलाई लाज लाग्दैन” ।

उनले मुलुक भ्रष्टाचारमा चुर्लुम्म डुबेको भन्दै विदेशीका अगाडि शिर झुकाएर हिँड्नु पर्ने अवस्था सिर्जना भएको बताए । उनले भ्रष्टाचारमुक्त समाज निर्माणमा आफू कति पनि नडगमगाउने प्रतिबद्धतासमेत जनाए ।

भ्रष्टाचारको अन्त्य नभएसम्म जति भाषण गरे पनि देश विकास नहुने उनको तर्क थियो । ‘अहिलेसम्मको कांग्रेस कसरी चल्यो ? म त्यता जान्नँ । तर अब कांग्रेसले कुनै प्रकारको भ्रष्टाचारलाई प्रश्रय दिने छैन,’ कोइरालाले प्रतिबद्धता जनाए ।