काठमाडौं । जहाज खरिद प्रकरण चलिरहेकै अवस्थामा ‘सुटुक्क’ संकृति, पर्यटन तथा नागरिक उड्डयन मन्त्रालय सचिवको सरुवा भएको छ ।
पर्यटन सचिव भरतमणि सुवेदीलाई सार्वजनिक खरिद तथा अनुगमन कार्यालयतिर हुत्याउँदै त्यो ठाउँमा दीपक काफ्लेलाई तानिएको छ । काफ्ले कोसी प्रदेशका प्रमुख सचिवमा कार्यरत थिए । त्यसरी सरूवा हुनुमा ‘आर्थिक चलखेल’कै कारक भएको मन्त्रालय उच्च अधिकारीहरु बताउँछन् । ती अधिकारी भन्छन्, ‘‘सचिव सुवेदीले ‘माथि’का दबाब र तनाव झेल्न सक्नुभएन र तिनका आदेश मान्नुभएन । त्यहीकारण सरूवा भएको हो ।’’
यतिखेरै सचिव परिवर्तन हुनुलाई रहस्यमय तरिकाले हेरिएको छ । सचिव सुवेदीले आफूहरुसँग फस्नुभन्दा बच्नु उपयुक्त ठानेको भनाई राखेको मन्त्रालयका एक उच्च अधिकारीले बताए ।
सुवेदीको भनाइ उद्धृत गर्दै ती अधिकारीले भने, ‘‘मन्त्रीजी पनि धेरै कुरा बुझ्नुहुन्न । शक्तिकेन्द्रबाट अनेक किसिमका दबाब आइरहेको थियो । तिनको इच्छा पूरा गरी आफू फँस्नुभन्दा सरुवा रोजेको हुँ ।’’
यतिखेर पर्यटन मन्त्रालय मातहतको नेपाल वायुसेवा निगमको दुर्गम उडान गर्ने ‘३ जहाज खरिद’ प्रक्रियामा छ । टेण्डर आह्वानपछि तीन कम्पनी जहाज खरिद निम्ति आवेदन भरेका छन् ।
निगमले दसैंको महाअष्टमीको दिन टेण्डर आह्वान गरेसँगै अनेक किसिमका आशंका जन्माएको थियो ।
नयाँ जहाज भाडामा ल्याउने, ‘पर्यटन ऐन’ गर्ने कार्य भइरहेको छ । त्रिभुवन अन्तर्राष्ट्रिय विमानस्थलको ‘ग्राउन्ड ह्यान्डलिङ’ विषयमा पनि नियामक निकाय नेपाल नागरिक उड्डयन प्राधिकधरण र निगमबीच जुहारी चलिरहेको छ ।
