काठमाडौं । केेहि दिन अघि मात्रै एउटा समाचार चर्चित थियो, “नेपालको सार्वजनिक ऋण २३ खर्ब, ९ अर्ब पुगेको छ” । यसले के बताऊछ भने देश निक्कै ठुलो अफ्ट्यारोमा छ । तर यही देशका प्रधानमन्त्रीको विदेश भ्रमण, निक्कै सम्पन्न देशका प्रधानमन्त्रीको विदेश भ्रमण भन्दा कम छैन । यस्तै भएको छ, प्रधानमन्त्री पुष्पकमल दाहाल ‘प्रचण्ड’ सहितको प्रतिनिधि मण्डलको अमेरिका र चीन भ्रमणमा चार करोड ७४ लाख रूपैयाँ खर्च भएको छ।

अर्थ मन्त्रालयले प्रधानमन्त्रीसहितको प्रतिनिधि मण्डलको यस्तो भ्रमण खर्च भुक्तानीको लागि परराष्ट्र मन्त्रालयको नाममा यो रकम निकासा गरेको जानकारी दिएको छ।

संयुक्त राष्ट्रसंघको ७८ औं महासभा र चीनको औपचारिक भ्रमणका क्रममा प्रधानमन्त्रीको प्रतिनिधि मण्डलको भ्रमण खर्चबापतको रकम निकासा गरिएको अर्थ मन्त्रालयले जनाएको छ।

प्रधानमन्त्री भदौ ३० गते अमेरिका गएका थिए। त्यसपछि उनी त्यतैबाट असोज ५ गते चीन पुगेका थिए। १३ असोजमा मात्रै उनी नेपाल फर्किएका थिए।