सल्यान । बनगाड कुपिण्डे नगरपालिका-१२, निगालचुलाको तालस्थित दलित जनता आधारभूत विद्यालय एक बर्षदेखि कार्यालय सहयोगीको भरमा छ । स्थायी दरबन्दी नभएको र नगरपालिकाले बजेटको अभाब देखाउँदै करार अनुदानमा शिक्षक भर्ना नगरिदिँदा विद्यालय कार्यालय सहयोगीको जिम्मेवारीमा पुगेको हो ।

विद्यालयमा कार्यालय सहयोगीसमेत एक जनामात्रै छन् । नर्सरीदेखि कक्षा-३ सम्मको पठनपाठन र विद्यालय सञ्चालन एक कार्यालय सहयोगीले गर्दै आएका छन् ।

विद्यालयकी कार्यालय सहयोगी खगिसरा थापाले विद्यालयमा शिक्षक भर्ना नगर्दा सबै आफैँले हेर्दै आएको बताइन् । ‘एक्लै भएकाले सबैलाई अहिले एउटै कोठामा राखेर पठनपाठन गराउँदै आएकी छु ,’ उनले भनिन् ।

२०६२ सालमा स्थापना भएको विद्यालयमा कक्षा १ मा २०, २ मा १५ र ३ मा १५ गरी ५० जना विद्यार्थी छन् । ४० विद्यार्थी नियमित आउने गरेका छन् । ‘एक्लैले छुट्टा-छुट्टै कक्षामा पढाउन सम्भव छैन । अहिले सबैलाई एकै कक्षामा राखेर सिकाउँछु,’ उनले भनिन् ।विद्यालय व्यवस्थापन समितिका अध्यक्ष रामबहादुर ओलीले शिक्षक नहुँदा बालबालिकाको पठनपाठन प्रभावित भएको बताए ।

‘शिक्षक दरबन्दी छैन । निजी श्रोतबाट राख्न सक्ने अवस्था छैन । नगरपालिकाले राखिदिँदैन । कार्यालय सहयोगीले पुरै विद्यालय हेर्नुपरेको छ,’ उनले भने, ‘कार्यालय सहयोगीको भरमा चलेको विद्यालयबाट विद्यार्थीले के सिक्छन् ? उनीहरुको भविष्य के हुन्छ?’

यसअघि विद्यालयमा करारमा भर्ना भएका शिक्षक थिए- हिरालाल डाँगी । तर नगरपालिकाले उनको करार अवधि थपेन । उनी विदा भए । डाँगीले छोडेपनि अर्को शिक्षकको बन्दोबस्त गरिदिन नगरपालिकालाई आग्रह गर्दा आर्थिक अभाव देखाएर शिक्षक भर्ना गर्न अस्वीकार गरेको अध्यक्ष ओलीले बताए ।

‘यहाँ विद्यालय आवश्यक छ भनेर नै विद्यालय खोलियो । तर १८ वर्षदेखि एउटा पनि दरबन्दी दिएको छैन । दरबन्दी नभएपछि विद्यालयमा राम्रो शिक्षक पनि प्रबन्ध गर्न सकिएन,’ अध्यक्ष ओलीले भने, ‘गाउँका नानीहरुको पढाइ अस्तव्यस्त छ ।’

सो वडाका अध्यक्ष लालबहादुर घर्तीले विद्यालयमा शिक्षकका लागि नगरपालिकामा कुरा गर्दा पनि सुनुवाई नभएको बताए । ‘गाउँका साना बालबालिकालाई विद्यालय जान सहज होस् भनेर बस्ती नजिकै विद्यालय सञ्चालन गरिएको छ । तर शिक्षक नहुँदा पठनपाठन अस्तब्यस्त भएको छ,’ उनले भने ।

बनगाड कुपिण्डे नगरपालिकाका उपप्रमुख पुरुषोत्तम आचार्यले भने पछिल्नो समयमा साना कक्षाहरुमा विद्यार्थी संख्या घट्दै गएकाले विद्यालय मर्ज गर्ने तयारी भइरहेको बताए । ‘नगरपालिकासँग पनि ठुलो आर्थिक स्रोत छैन । पर्याप्त बजेट नभएका कारण हामीले शिक्षक हटाउनुपर्‍यो । अब विद्यालयहरु मर्ज गर्ने तयारी भइरहेको छ,’ उनले भने ।

उनले तालमा रहेको दलित जनता प्रावि र पालिका भित्रका अन्य केही प्राविमा विद्यार्थी संख्याको आधारमा शिक्षक भर्ना गर्ने तयारी रहेकाे समेत जानकारी दिए । कान्तिपुरमा समाचार छ ।