काठमाडौं । विश्वकै लामो मुक्तिनाथ केबलकार निर्माण गर्न आधा खर्ब बढी लाग्ने भएको छ ।
मुक्तिनाथ दर्शन प्रालिले बुधबार लगानी बोर्डलाई बुझाएको नयाँ (अपडेटेड) विस्तृत आयोजना प्रतिवेदन (डीपीआर) अनुसार कुल लागत ५५ अर्ब १८ करोड रुपैयाँ रहेको हो ।
यस अनुसार आयोजनाको प्रतिकिलोमिटर लागत करिब ६९ करोड रुपैयाँ लाग्ने भएको छ । ५ वर्ष अघि बोर्ड र कम्पनी बीच भएको केबलकार निर्माण तथा सञ्चालन सम्बन्धी समझदारीपत्र अनुसार केलबलकारको अनुमानित लागत ३९ अर्ब २० करोड रुपैयाँ थियो ।
कास्कीको सेराबेँसीदेखि मुस्ताङको मुक्तिनाथ मन्दिर (रानीपौवा)सम्म निर्माण हुने उक्त केबलकारको लम्बाइ ८१.०१४ किलोमिटर रहेको छ । केबलकार विरेठाँटी, घोडेपानी, तातोपानी, लेते, कोवाङ, टुकुचे, मार्फा हुँदै मुक्तिनाथ पुग्नेछ ।
कम्पनीले बुधबार नै आयोजनाको वातावरणीय प्रभाव मूल्यांकन प्रतिवेदन (ईआइए) पनि बोर्डमा बुझाएको छ । डीपीआर र ईआइए प्रतिवेदन बुझाएसँगै अब आयोजनाको लगानी सम्झौता (पीआइए) गर्ने बाटो खुलेको छ ।
मुक्तिनाथ केबलकार इन्जिनियरिङ प्रोक्योरमेन्ट कन्ट्रयाक्ट र लगानी (ईपीसीएफ) मोडेलमा निर्माण हुनेछ । जसमा भारतको के एन्ड आर इन्जिनियरिङ लिमिटेडले लगानीसँगै निर्माण पनि गर्ने प्रारम्भिक सम्झौता भइसकेको छ ।
मुक्तिनाथ दर्शन प्रालिका अनुसार शिलान्यास गरिएको ४ वर्षमा केबलकार निर्माण सम्पन्न हुनेछ । आयोजनाको लागि आवश्यक जग्गा खरिद प्रक्रिया अघि बढिसकेको छ । चाँडै सम्झौता गरी निर्माण थालिने कम्पनीले जनाएको छ ।
डीपीआर अनुसार केबलकारमा कुल १९ वटा स्टेशन हुनेछन् । प्रत्येक स्टेसनमा रिसोर्ट बनाउने कम्पनीको योजना छ । ११ वटा स्टेशनमा बास बसेर जान पाइने व्यवस्था हुनेछ भने ८ स्टेशनमा अनिवार्य ओर्लिनुपर्ने छ । ५ स्टेशनमा अत्यावश्यक भएमात्र ओर्लिन पाइने व्यवस्था गरिने छ ।
केबलकारमा ७७६ वटा गोन्डोला राख्ने प्रस्ताव गरिएको छ । उक्त केलबार निर्माणपछि वार्षिक ३६ लाखले यात्र गर्ने कम्पनीको अनुमान छ ।
