काठमाडौं । सेयर बजार लगातारजस्तै बढेको छ । आइतबार ३१.६२ अंकले बढेर २,१२०.६२ विन्दुमा बन्द भएको बजारमा पाँच अर्ब ४५ करोड रुपैयाँको कारोबार भयो ।

एक दिनको मात्र करोबार नभएर दैनिक कारोबार रकम बढ्दै गएको छ । लामो समयसम्म सेयर बजार ओरालो लागेर अहिले विस्तारै उकालो गतिमा लागेको देखिन्छ । बजार घटेको समयमा राम्रा कम्पनीमा लगानीकर्ताहरू आकर्षित भएको देखिन्छन् ।

तर, बजार बढ्न थालेपछि कमजोर कम्पनीको मूल्य पनि बढेको छ । कतिपय राम्रा कम्पनीको मूल्य भने बढ्न सकेको छैन ।

हाल नेप्सेमा सूचीकृत भएर कारोबार हुँदै आएका कम्पनीहरूमध्ये सबैभन्दा महँगो सेयर युनिलिभरको छ । यो कम्पनीको सेयरमूल्य प्रतिकित्ता ३८ हजार ९०० रुपैयाँ छ । यो गत आइतबारको कारोबार दिनको अन्तिम मूल्य हो ।

त्यस्तै, बढी मूल्य भएको दोस्रोमा राष्ट्रिय बिमा कम्पनी छ । यो कम्पनीको सेयरमूल्य प्रतिकित्ता १४ हजार १६० रुपैयाँ छ । त्यस्तै, महँगो सेयरमूल्य हुनेमा बोटलर्स नेपाल (तराई) पनि छ । यो कम्पनीको सेयरमूल्य पनि १२ हजार ८०० को आसपासमा छ ।

त्यसपछिका कम्पनीहरूको मूल्य भने पाँच हजारभन्दा तल छ । सबैभन्दा सेयरमूल्य सस्तो भने वाणिज्य बैंक समूहमा भएका कम्पनीको छ । समूहमा भएका १९ वाणिज्य बैंककै सेयरमूल्य अन्य कम्पनीको तुलनामा कम छ ।

वाणिज्य बैंकहरूमध्ये स्ट्यान्डर्ड चाटर्ड बैंकको सेयरमूल्य सबैभन्दा महँगो छ । यो बैंकको सेयरमूल्य प्रतिकित्ता ५२६ छ त्यस्तै एभरेस्ट बैंकको ५२५, एनआईसी एसिया बैंकको ५११ र नबिल बैंकको ५०० भन्दा कम छ । अन्य अधिकांशं वाणिज्य बैंकको सेयरमूल्य भने ४०० भन्दा कम छ । त्यसमा पनि कुमारी बैंककै सेयरमूल्य सबैभन्दा कम छ । यो बैंकको सेयरमूल्य प्रतिकित्ता १५९ रुपैयाँ छ ।

त्यसैगरी हिमाल दोलखा हाइड्रोपावर कम्पनीको सेयरमूल्य भने १५० भन्दा कम छ ।