काठमाडौं । राजा ज्ञानेन्द्र शाहले २०५८ जेठ १९ मा घटेको विनासकारी घटनाको स्मरण गर्दै त्यसबेला आफू र आफ्नो परिवारप्रति नकारात्मक धारणा फैलाइएको बताएका छन् ।

वीरगन्जमा शनिबार भएको कार्यक्रममा उनले गरेको सम्बोधनमा भनेका छन्, “जेठ १९, २०५८ मा घटेको विनाशकारी घटना जुन हामी र हाम्रो परिवारलाई कहाली लाग्दो र सम्झन मन नपराउने अवस्थालाई राजनीतिक जालझेल गरी धेरै नेपालीको मनमा भ्रमको बादल बनाइ नकारात्मक भावना फैलाएका थिए । हामी र हाम्रो परिवारलाई घातक प्रहारहरु पनि गरेका थिए । सत्य सधैँ सच्य हुन्छ । असत्यको विजयी कहिले हुँदैन । हाम्रो माझ प्रत्यक्षदर्शीहरु हुँदाहुँदै अज्ञानता र छलले अझ पनि हामी बहकीरहेका छौँ । यो अन्यायपूर्ण मात्र होइन दुर्भाग्यपूर्ण पनि हो ।”

उनले २०६५ जेठ २९मा दरबार त्याग गर्ने बेलामा पनि आफू नेपालभित्रै बसेर मुलुकको बृहत्तर हित र शान्तिका लागि योगदान गर्न चाहेको बताएको स्मरण गरेका छन् ।

उनले आफ्नो गरिमापूर्ण राजपाटबाट वियुक्त हुनुपर्दा मैले व्यक्त गरेका राष्ट्रियता, प्रजातान्त्रिक प्रतिवद्धता तथा देश र जनताको उत्थानमा कृयाशील हुने भावनालाई मैले आज पनि सान्दर्भिक रुपमा सम्झिइरहेको बताउँदै भनेका छन्, “त्यसै आसयअनुरुप मैले चिरकाल प्रर्यन्त सुरक्षित रहोस् भनेर आफ्नो श्रीपेच राष्ट्रलाई सुम्पिएको थिएँ ।”