काठमाडौं । देशभर रहेका लाइन्स लियोबीच आन्तरिक खुला फुटसल प्रतियोगिता माघ २७ र २८ गते आयोजना हुने भएको छ । शुक्रबार लाइन्स एन्ड लियो क्लब अफ काठमाडौं प्रयासनगरले पत्रकार सम्मेलन आयोजना गर्दै प्रतियोगिताको मिति घोषणा गरेको हो ।
दुई दिने प्रतियोगितामा देशभरबाट २० देखि ३० टोली सहभागी हुने क्लबका सचिव नविन न्यौपानेले बताएका छन् ।
“हामीसँग ३० भन्दा माथि क्लबहरू छन् । अहिलेसम्म १० क्लबले दर्ता गरिसकेका छन् । धेरै भन्दा धेरैलाई सहभागिता गराउँछौँ,” सचिव न्यौपानेले भने ।
प्रतियोगिता मिट भ्याली कलेज ज्ञानेश्वरको मैदानमा हुने छ । इच्छुक क्लबले तीन हजार दर्ता शुल्क तिरेर सहभागी हुन पाउनेछन् । क्लबका अध्यक्ष विराट केसीले सामाजिक कार्यबाट माथि उठेर भाइचारा सम्बन्ध बढाउन फुटसल प्रतियोगिता आयोजना गरेको बताए ।
प्रतियोगिताको विजेताले १५ र उपविजेताले आठ हजार पुरस्कार तथा ट्रफी पाउने अध्यक्ष केसीले बताए । सर्वाेत्कृष्ट खेलाडीले २५ सयसहित ट्रफी पाउनेछन् । प्रतियोगिता आयोजना गर्न अनुमानित एक लाख ५३ हजार खर्च हुने क्लबले जनाएको छ ।
