विराटनगर । “तपाईं को हो, किन यहाँ उभिरहनुभएको ? कसले उभिन भन्यो ? उता जानुहोस्,” यातायात व्यवस्था कार्यालय इटहरीका निमित्त प्रमुख चन्द्रप्रसाद प्रसाईं गर्जिए ।

मुखमा मास्क लगाएका व्यक्ति टसमस गरेनन् । सुन्दरहरैँचा गाउँपालिकाको बाँसबारीस्थित ट्रायल सेन्टरमा आइतबार अपराह्नको यो कुराकानी यतिमै रोकिएन ।

प्रसाईं ती व्यक्तिको नजिकै आएर फेरि ‘गइहाल्नुस्’ भन्दै कड्किए । यसअघि, प्रहरीले नजिकै उभिएका अरू सेवाग्राहीलाई पर जान भनिरहेका थिए । प्रसाईंले ‘पर जानू’ भन्दै आग्रह गरेका व्यक्ति ट्रयाल सेन्टरको टहरोबाट तल ओर्लिए ।

मुखमा लगाएको कालो मास्क खोलेर उनले आफ्नो परिचय दिए । आफू कोसी प्रदेशको आन्तरिक मामिला तथा कानुनमन्त्री शम्शेर राई भएको उनले बताए ।

मन्त्रीको परिचयपछि यातायातका निमित्त प्रमुख प्रसाईं अक्क न वक्क भए । त्यसपछि मन्त्री राईसँगै गएका मन्त्रालयका इन्जिनियरले ‘ट्रयालमा उत्तीर्ण र अनुत्तीर्ण भएकाहरूको नामावली पछाडि किन विवरण उल्लेख नगरेको ?’ भन्दै प्रश्न गरे ।

प्रसाईंले ‘केही विवरण मिलाउनुपर्ने भएकोले त्यो पछि गर्ने तयारी गरेको’ सुनाए । ट्रायल प्रक्रियामा प्राविधिक नराखेको र तत्कालै पासफेल विवरण नराख्नु विधिसम्मत नभएको इन्जिनियरले बताए ।

मन्त्री राई बोलेनन् । तर, इसारा गर्दै प्रक्रियाअनुरूप काम गर्न उनले यातायातका प्रमुखलाई सुझाए । त्यसपछि त्यहाँ खटिएका कर्मचारीले फटाफट उत्तीर्ण परीक्षार्थीको नामको दायाँ ‘पास’ र अनुत्तीर्णको पछाडि ‘फेल’ लेख्न थाले ।

आफू सर्वसाधारणजस्तै बनेर उनीहरूले ट्रयाल दिँदा के कस्तो समस्या भोग्नुपर्ने रहेछ भन्ने बुझ्न अनुगमनमा गएको मन्त्री राईले बताए । “कर्मचारीको व्यवहार कस्तो हुने रहेछ भन्ने बुझ्न म अनौपचारिक भेषमा मास्क लगाएर यातायात व्यवस्था कार्यालयको ट्रायल सेन्टर पुगेको हुँ,” उनले भने, “त्यहाँ हुने गरेको कमजोरी र गलफदी मैले आफ्नै आँखाले प्रस्ट देखेँ । अबदेखि गल्ती नगर्न निर्देशन दिएको छु ।”

अनुगमनमा जाँदा मन्त्री राईले आफ्ना सुरक्षाकर्मी र सचिवालयका कर्मचारीलाई समेत अनौपचारिक पोसाक लगाउन भनेका थिए ।

आइतबार स्थानीय केशर बस्नेतले सिटी सफारीको लाइसेन्स लिन ट्रायल गरेका थिए । ट्रयाल दिँदा एक कर्मचारीले ‘लाइन छोएको’ भनेको उनले सुनाए । अर्को कर्मचारीले ‘ठिक छ’ भनेको उनको भनाइ छ ।

“दुईजना कर्मचारीमध्ये एकले लाइन छोयो भन्नुभयो, अर्कोले ठिक छ भन्नुभयो,” उनले भने, “उसो भा म पासफेल के भएँ भनेर सोध्दा अहिले जानुहोस् भन्नुभयो ।”

निमत्त प्रमुख प्रसाईंले यातायात कार्यालयले सकेसम्म सेवाग्राहीलाई झन्झट नदिने प्रयास गर्दै आएको जिकिर गरे । उनले भने, “फेसबुक पेज पनि बनाएका छौँ । त्यसमा परीक्षा, ट्रायल आदि सबै विषयमा जानकारी राखिदिने गरेका छौँ ।”

इटहरी कार्यालयले महिनामा पाँचपटक ट्रायल गराउने गर्छ । त्यसमा हलुकादेखि ठूला सवारीसाधनको पनि ट्रायल गराइन्छ । एकपटकमा १५० देखि २०० जनासम्मले ट्रायल दिन्छन् । बायोमेट्रिक भएको चार दिनमा ट्रायल हुन्छ । एक दिन रिट्रायल गर्ने प्रबन्ध समेत गरिएको कार्यालयले जनाएको छ ।