काठमाडौं । काठमाडौं महानगरपालिकाका प्रहरी र फुटपाथ व्यापारीबीच झडप भएको छ । बुधबार साँझ सुन्धारास्थित फुटपाथमा भएको झडपका क्रममा सातजना नगर प्रहरी घाइते भएको महानगर प्रहरी प्रमुख राजुनाथ पाण्डेले जानकारी दिए ।

उनका अनुसार घाइतेहरूको वीर अस्पतालमा उपचार भइरहेको छ । उनले आफूहरूमाथि फुटपाथ व्यापारीले आक्रमण गरेपछि झडपको स्थिति सिर्जना भएको बताए ।

“फुटपाथ व्यापारीहरूले हाम्रो प्रहरीमाथि आक्रमण गरेको हो । सातजना जति घाइते भएका छन् । उनीहरूको वीर अस्पतालमा उपचार भइरहेको छ,” उनले भने ।

फुटपाथ व्यापारीतर्फ पनि केही घाइते भएका छन् । तर, महानगर प्रहरी प्रमुख पाण्डेले आफूहरूलाई फुटपाथतर्फका घाइतेबारे कुनै जानकारी नभएको बताए ।
महानगरले फुटपाथ पैदल यात्रुका लागि सहज बनाउने उद्देश्य लिएको छ ।