काठमाडौं । राष्ट्रियसभा सदस्य डा. विमला राई पौड्यालले राष्ट्रियसभालाई सरकारले बेवास्ता गरेको बताएकी छन् । बिहीबार राष्ट्रियसभा बैठकमा आउँदो आर्थिक वर्ष २०८१/०८२ को सिद्धान्त र प्राथमिकतामाथिको छलफलका क्रममा उनले यस्तो बताएकी हुन् ।

मन्त्रालयसँग सम्बन्धित विषयमा छलफल गरिँदा सम्बन्धित मन्त्री समेत उपस्थित हुनुपर्ने प्रावधान रहेको उनले उल्लेख गरिन् । विनियोजन विधेयकको सिद्धान्त र प्राथमिकता पढेर सुनाउने अर्थमन्त्री डा. प्रकाशशरण महत नै उपस्थित नभएको सभामा सरकारले सांसदहरूले राखेका धारणा कसरी सुन्छ र ग्रहण गर्छ ? भनी उनले प्रश्न गरिन् ।

“…कुनै मन्त्रालयसँग सम्बन्धित विषयमा छलफल हुँदाको अवस्थामा सम्बन्धित मन्त्री समेत उपस्थित हुनुपर्नेछ । आजको सम्बन्धित मन्त्री अर्थमन्त्री हो, किनभने उहाँले यो पढेर सुनाउनुभएको हो यहाँ । विनियोजन विधेयकको सिद्धान्त र प्राथमिकता,” उनले भनिन्, “उहाँ हुनु हुन्न । उहाँसँगै विशिष्ट कर्मचारीहरू पनि हुनु हुन्न । यो भनेको राष्ट्रियसभाको आज अन्तिम दिनमा बोल्दै गर्दा किन हेपेको होला सरकारले राष्ट्रियसभालाई भन्ने महसुस भयो । मेरो नियमापत्ति, विरोध नै हो । सरकारले चेतोस् ।”

सुरु गरिसकेका आयोजना पूरा गर्नेतर्फ बजेट र कार्यक्रमको ध्यान जानुपर्ने उनले बताइन् । (न्युज एजेन्सी नेपाल)