काठमाडौं । नेपाल राष्ट्र बैंकले निर्देशक थानेश्वर आचार्यलाई बर्खास्त गरेको छ । महिला कर्मचारीमाथि यौन दुर्व्यवहार गरेको आरोपमा उनलाई बर्खास्त गरेको राष्ट्र बैंकका सहायक सूचना अधिकारी डिल्लीराम पोखरेलले बताए । पटक–पटक कर्मचारी अनुशासन उल्लंघन गरेपछि आचार्यलाई सेवाबाट हटाइएको राष्ट्र बैंक जनाएको छ ।आचार्यले गत २७ पुसमा केन्द्रीय बैंकका उच्च अधिकारीको ‘स्ट्रेस म्यानेजमेन्ट’ कार्यक्रममा ती कर्माचारीमाथि दुर्व्यवहार गरेका थिए ।

आचार्यले उनलाई दुर्व्यवहार गर्नुभन्दा अघि पनि पटक–पटक अनुशासनहीन कार्य गरेपछि कारबाहीमा परेका थिए ।ती महिला कर्मचारीमाथि दुर्व्यवहार गरेपछि राष्ट्र बैंकले छानबिन समिति बनाएको थियो । छानबिन क्रममा दोषी देखिएका आचार्यलाई स्पष्टीकरण सोधिएको तर उनको स्पष्टीकरण चित्तबुझ्दो नभएपछि केन्द्रीय बैंकले सेवाबाट हटाएको हो ।