काठमाडौं । लामो समयदेखि माातृशिशु स्याहारमा क्रियाशिल महिलास्वास्थ्य स्वयं सेविकाकालाई सम्मानसहित बिदाई गरिएको छ । बिहीबार एक कार्यक्रमको आयोजना गरी जिल्लाका ११ जना स्वास्थ्य स्वयम्सेविकालाई सम्मान सहित बिदाइ गरिएको हो ।

दुई दशकभन्दा बढी समयसम्म सेवा गरेका तथा ६० वर्ष उमेर पुगेका स्वयम्सेविकाको भूमिकाको मुल्याङ्कन गरेर ७० हजार नगदसहित बिदाई गरिएको हो । मातृशिशु स्वास्थ्य क्षेत्रमाा कार्यरत स्वास्थ्य स्वयं सेविकालाई ६० वर्ष उमेरपछि बिदाई गर्ने गरिएको स्वास्थ्य कार्यालय पाल्पाका प्रमुख डा. राजेन्द्रकुमार गिरीले जानकारी दिनुभयो । पछिल्लो समय तीन तहकै सरकारले स्वयम्सेविकाको भूमिकाको मुल्याङ्कन गरेर रकमसहित बिदाई गर्ने गरेको उहाँले उल्लेख गर्नुभयो ।

बिदाई तथा सम्मान कार्यक्रममा बोल्दै जिल्ला समन्वय समिति पाल्पाका प्रमुख टंकनाथ खनालले ग्रामीण क्षेत्रमा सुत्केरी महिलाको सेवा गरेर स्वयम्सेविकाहरूले राज्यका लागि अमूल्य सहयोग गरेको बताउनुभयो । बिदाइ भएपनि स्वास्थ्य स्वय सेविकाहरूले आफ्नो अनुभव समाजको हितमा बाँड्न सक्ने उहाँले उल्लेख गर्नुभयो । बिदाई हुने पूर्वखोला रिङ्नेरहकी स्वास्थ्य स्वयम्सेविका सीता आचार्यले आफूहरूले मातृ तथा शिशुको मृत्युदर घटाउन र उनीहरूको स्वास्थ्य उपचारमा सकेको सहयोग गरेको बताउनुभयो । उहाँले भन्नुभयो, “पैसा ठूलो कुरा होइन भनेर हामीले दुई÷तीन दशकसम्म सेवा गर्याे, अबदेखि भूमिकामा नरहेपनि आवश्यक परेको बेला सहयोग गर्छौँ ।”

स्वास्थ्य स्वयम्सेविकालाई पछिल्लो समय पाल्पाका स्थानीय तहहरूले समेत रकमसहित बिदाई गर्ने निती लिएका छन् । जिल्लाको अधिकांश पालिकाले उमेर तथा अन्य कारणले बिदाई हुने स्वयम्सेविकालाई रकमसहित बिदाई गर्न थालेको पूर्वखोला गाउँपालिकाका स्वास्थ्य शाखा प्रमुख मोहन ढकालले जानकारी दिनुभयो । उहाँका अनुसार पूर्वखोला गाउँपालिकाले २५ हजार रुपियाँ स्वास्थ्य स्वयम्सेविकालाई दिने गरेको छ ।