काठमाडौं । धादिङ जिल्लाको उत्तरी क्षेत्र गङ्गाजमुना गाउँपालिका–३ गुम्दीस्थित गुरुङगाउँको ‘अम्बोटे होमस्टे’ आन्तरिक र बाह्य पर्यटकको आकर्षणको केन्द्र बन्दै गएको छ । विसं २०७८ चैतमा शान्ति नेपाल नामक गैरसरकारी संस्थाको सहयोगमा गङ्गाजमुना गाउँपालिकाले गुरुङगाउँलाई नमुना गाउँ घोषणा गरेसँगै ‘अम्बोटे होमस्टे’ सञ्चालनमा ल्याइएको हो । अम्बोटेभित्र आएका पर्यटकले सिँढी पदमार्ग, अग्र्यानिक कफी र मौसमअनुसारको फलफूलको मज्जा लिन पाउँछन् । उक्त होमस्टे(घरवास)बाट आलुपोखरा ‘भ्यू टावर’, गङ्गाजमुना मन्दिर, त्रिपुरासुन्दरी मन्दिरलगायतका ठाउँमा जान सकिन्छ ।

अम्बोटे होमस्टे सञ्चालक समितिका अध्यक्ष उत्तम गुरुङले आन्तरिक तथा बाह्य पर्यटकलाई सेवा प्रदान गर्नका लागि विगत दुई वर्षदेखि होमस्टे सञ्चालनमा ल्याइएको जानकारी दिनुभयो । “गुरुङगाउँलाई नमुना गाउँ घोषणा गरेसँगै यहाँ आउने आन्तरिक तथा बाह्य पर्यटकलाई खान बस्न सहज बनाउनका लागि होमस्टे सञ्चालनमा ल्याएका हौँ,”उहाँले भन्नुभयो । अम्बोटेमा हाल १६ घरधुरी गुरुङ समुदायको रहेको छ । गुरुङ सेवा समाज अम्बोटेका अध्यक्ष मनबहादुर गुरुङले खाना र बस्नबाहेक गुरुङ संस्कृतिको माध्यामबाट आन्तरिक तथा बाह्य पर्यटक प्रवद्र्धनमा अम्बोटे होमस्टे लागिरहेको बताउनुभयो । गुरुङ जातिको मुख्य संस्कृति कौरा, चुड्का, रोधीलगायतका हुन् । अम्बोटे होमस्टेमा मासिक दुई सयदेखि पाँच सयसम्म आन्तरिक र बाह्य पर्यटक आउने गरेका छन् । दैनिक ३० देखि ५० जनासम्म बस्न मिल्ने क्षमता रहेको उक्त होमस्टेका सबै घरमा बसोबास गर्न मिल्ने व्यवस्था गरिएको छ । अम्बोटे होमस्टेमा एकरात खान र बस्नका लागि रु ६०० देखि रु एक हजार २०० सम्म लाग्दछ ।

होमस्टेमा आउने पाहुनालाई यही उत्पादित अग्र्यानिक खाद्यान्न खुवाउँदै आएको अध्यक्ष गुरुङले बताउनुभयो । यहाँ होमस्टे सञ्चालन गरेसँगै नजिकका गाउँहरुले समेत अग्र्यानिक खाद्यान्न उत्पादनलाई जोड दिँदै आएका छन् उहाँले भन्नुभयो,“गुरुङगाउँमा उत्पादन भएको सामानले नपुग्ने स्थिती आएमा छिमेकी गाउँहरुबाट खाद्यान्नहरु ल्याएर भएपनि पाहुनालाई अग्र्यानिक खाद्यान्नमार्फत सत्कार गर्दछौँ । होमस्टे सञ्चालनबाट आम्दानी भएको रकम होमस्टेमा आवश्यक पर्ने सामाग्री खरीदमा लगाउँदै आएको र बाँकी रकम कोष बनाएर बचत गरिएको छ । यहाँ आउने पाहुनाको राय र सुझावलाई ध्यानमा राखेर होमस्टेलाई थप व्यवस्थित र सुविधासम्पन्न बनाउँदै लैजाने समितिले जनाएको छ । गुरुङगाउँमा होमस्टे सञ्चालनमा आएसँगै गाउँपालिकाले समेत होमस्टे कार्यक्रमलाई प्राथमिकता दिएको छ । गाउँपालिकाका प्रमुख प्रशासकीय अधिकृत अनिल श्रेष्ठले गाउँपालिकाको वडा नं ७ स्थित भैँसे र वडा नं ३ स्थिति अम्बोटे होमस्टेलाई गाउँपालिकाले विशेष रुपमा अगाडि बढाउने बताउनुभयो । गाउँपालिकाले पर्यटन प्रवद्र्धनका लागि चालु आवमा रु ७० लाख रकम विनियोजन गरेको छ । विनियोजन गरेको रकममध्ये ‘गङ्गाजमुना तीनसुरे पदमार्ग’को प्रवद्र्धन, होमस्टे विकास, गङ्गाजमुनाबाट चुमभ्याली र रुविभ्याली हुँदै लाङटाङ जोड्ने ‘ग्रीन ट्रेकिङ ट्रेल’लाई पालिकाले गौरवको आयोजनाका रुपमा अगाडि बढाएको छ ।

यस्तै, गाउँपालिकाको पर्यटन प्रवद्र्धनका लागि ठाउँठाउँमा सूचना पार्टी निर्माण, पर्यटन मन्त्रालय र पर्यटन बोर्डको सहकार्यमा ‘गङ्गाजमुना पर्यटन पूर्वाधार विकास योजना’ अन्तर्गत गङ्गाजमुना मन्दिर परिसरमा मन्दिर, भजन मण्डली, पाहुना घर, गुम्बा निर्माण कार्य अगाडि बढाइएको छ । ‘कृषि, पर्यटन र पूर्वाधार ः गङ्गाजमुना विकासको आधार‘ भन्ने मूल नारा बोकेको उक्त गाउँपालिकाले अन्य गाउँपालिकाको सहकार्यमा नर्सिङ धाम–गङ्गाजमुना–सल्यानकोट माई मन्दिरलाई धार्मिक पर्यटन सर्किटका रुपमा विकास गर्न लागेको छ । अम्बोटेमा होमस्टे सञ्चालनमा आएसँगै उक्त गाउँपालिकाका अन्य गाउँमा समेत होमस्टे सञ्चालनका लागि जनआवाज उठ्न थालेको छ । गङ्गाजमुना वडा नं ३ का वडाअध्यक्ष राजकुमार गुरुङले अम्बोटे होमस्टेलाई नमुना होमस्टेका रुपमा विकास गर्दै लैजाने बताउनुभयो । उहाँले आगामी दिनमा आलुपोखरासमेत होमस्टे सञ्चालन गरिने लक्ष्य लिइएको उल्लेख गर्नुभयो ।