काठमाडौं । देशभर हिउदे मनसुन सक्रिय रहेको छ । जसका कारण कतै भारी वर्षा भएको छ भने कतै सामान्य । चैत्र बैशाख महिना वर्षा संगै हावा हुरीको पनि महिना हो । यस्तै भारी वर्षाका कारण बुटवलका केही ठाउँ पनि डुबानमा परेका छन् ।
भारी वर्षाले हाटबजारलाइन नजिकका रुपन्देही उद्योग संघको सचिवालय, राष्ट्रिय समाचार समिति र बस समितिको कार्यालयका भुइँतलामा बाढी पसेको छ ।
यस्तै मुख्य व्यापारिक केन्द्र अमरपथमा सोह्र छत्तीस कुलोको नहर थुनिँदा बजार क्षेत्रमा फोहोर लेदोसहितको बाढी पसेर आउजाउमा असर पुर्याएको छ । बुटवल कालिकानगरको न्यु होराइजन बोर्डिङ स्कुल परिसरमा बाढी पसेर जलमग्न भएको छ ।
बजार दुर्गन्धित, स्कुल बन्द
बाढी पसेपछि विद्यालयले आज एक दिनका लागि पठन पाठन बन्द गरेको छ । फोहोरको लेदोले बजार क्षेत्र दुर्गन्धित भएको छ ।रुपन्देही उद्योग संघका प्रमुख कार्यकारी अधिकृत यादव भण्डारीले कार्यालयको तल्लो तलामा पूरै लेदोले भरिएर पस्न नमिल्ने भएकाले कार्यालय माथिल्लो तलामा सार्न थालिएको बताए ।
बुटवल उपमहानगरपालिकाका इन्जिनियर गौतम रौनियारले सोह्र–छत्तीस कुलोमा रहेको गेट बन्द भएकाले पानी बग्न नपाई डुबानको समस्या आएको बताए ।कालिकानगरस्थित शुभ नारायणी फर्निचर उद्योगमा बाढी पस्दा करिब ५ लाखको प्लाइउड नोक्सान भएको उद्योगी अशोक कुँवरले बताए । कुलोको पानी सबै फर्केर घर र पसलमा पुगेको उनको भनाइ छ ।
इलाका प्रहरी कार्यालय बुटवलका प्रमुख डिएसपी विजयराज पण्डितले नाली र कुलो थुनिँदा डुबानको समस्या आएको बताए । विभिन्न ठाउँमा बाढी पसेर धनमालको क्षति भएपनि मानवीय क्षति नभएकाले उनले बताए ।
